Шавкат Мирзиёев 9 февраль куни Туркиянинг Ўзбекистондаги элчихонасига бориб, турк қардошларга яна бир бор ҳамдардлик билдирди, деб хабар бермоқда Президент матбуот хизмати.
6 февраль куни Туркиянинг жануби-шарқий элларида юз берган кучли зилзилалардан сўнг давлат раҳбари ўша куниёқ қардош Туркия халқига ва президент Ражаб Тоййиб Эрдўғонга ҳамдардлик билдирган эди.
Зилзила оқибатларини бартараф этишда кўмаклашиш учун Ўзбекистонда бир неча гуруҳ қутқарувчилар Туркияга юборилди. Шунингдек, гуманитар ёрдам юклари мунтазам жўнатиб турилибди.
Президент Туркиянинг Ўзбекистондаги элчихонасида очилган ҳамдардлик китобига тасалли сўзларни ёзиб қолдирди. Марҳумларнинг оиласи ва яқинларига сабр-тоқат сўраб, жароҳат олган инсонлар тез фурсатларда соғайиб кетишини тилади.
Шавкат Мирзиёев Ўзбекистон барча зарур ёрдамга тайёрлигини билдирди.
Изоҳ (0)