Қирғизистон собиқ президенти Алмазбек Атамбаев озодликка чиққанидан кейин мамлакатни тарк этди. Бу ҳақда унинг яқинлари маълум қилди, деб ёзмоқда Кaktus Media.
Манбаларга кўра, Атамбаев Дубайга йўл олган, у ердан Испанияга жўнаб кетишни режалаштирган. У билан бирга ўғли, Бишкек шаҳар кенгаши депутати Қодир Атамбаев ҳам Қирғизистонни тарк этган.
Атамбаевнинг ўзи озодликка чиққанидан сўнг Испания ҳукумати раҳбари таклифига биноан даволаниш учун ушбу мамлакатга учиб кетиш ниятида эканини айтганди.
Атамбаев Қирғизистонни 2011 йил декабридан 2017 йил ноябргача бошқарган. 2019 йил август ойида у криминал авторитет Азиз Батукаевни ноқонуний равишда озод қилиш, шунингдек, иссиқлик электр станциясини модернизация қилишдаги қонунбузарликлар, офис сотиб олиш, Қўй-Тош посёлкасида ер участкасини ноқонуний олиб қўйиш ва ижарага бериш каби айбловлар билан қўлга олинган ва 11 йил-у икки ойга озодликдан маҳрум қилинганди.
2020 йил октябрь ойида Қирғизистонда мамлакат парламенти учун сайловларда белгиланган чегарадан ўта олмаган партиялар тарафдорлари томонидан норозилик намойишлари ўтказилди. Акциялардан бирида намойишчилар Атамбаевни тергов изоляторидан озод қилди. Тўрт кундан кейин Атамбаев Бишкекдаги оммавий тартибсизликларни уюштирганликда айбланиб, яна ҳибсга олинди.
2023 йил 14 февралда Олий суд Атамбаевга нисбатан чиқарилган аввалги ҳукмни бекор қилди. Собиқ президент колониядан озод қилинди ва даволаниш учун хорижга кетишига рухсат берилди.
Изоҳ (0)