Ҳамма уни отасига тақлид қилади, деб ўйлаганди, бироқ у ўз йўлини топди: Болливуд актёри Тайгер Шрофф ҳақида

Ҳозирги кунда Тайгер Шрофф Болливуддаги энг машҳур, муваффақиятга эришган ёш истеъдодли актёрлардан бири ҳисобланади. Актёр бу натижага эришгунига қадар отасининг обрўсидан фойдаланмади, аксинча ўзи томошабинларнинг эътирофига сазовор бўлиш учун ҳаракат қилди.

Тайгер Шрофф 1990 йилнинг 2 март санасида таниқли ҳинд актёри Жеки Шрофф ва унинг рафиқаси, модел Аиша Шрофф оиласида туғилган. Жуфтлик фарзандига Жай Ҳемант Шрофф деб исм қўйди, бироқ кўплаб мухлислари уни Тайгер лақаби билан билади.

Актёр интервьюларининг бирида ўзини Жай эмас, Тайгер (Tiger — инглизчадан таржима қилинганда “йўлбарс” деган маънони англатади) деб билишини, чунки унга болалигидан атрофдагиларни тишлашга мойил бўлганлиги учун унга шундай “шафқатсиз” лақаб қўйилганини айтган. Тайгернинг қурбонларидан бири бошланғич мактабда ўқиётган вақтда у тишлаган ва деярли ҳайдалишига сабаб бўлган мактаб ўқитувчиси эди.

Отасининг шон-шуҳрати юки у учун Жеки Шроффнинг бир қатор нотўғри молиявий қарорлари каби оғир эди. Актёрнинг онаси суратга олган фильм 2002 йилда экранларда намойиш этилишидан олдин ижтимоий тармоқларда тарқалиб кетди ва муваффақиятсиз лойиҳалардан бирига айланди. Ўша пайтда Тайгер 11 ёшда эди ва у нима бўлаётганини жуда яхши тушунганди.

“Уйдаги мебелларимиз бирин-кетин сотилиб кетганини эслайман. Ёшлигимда атрофимда кўрган нарсаларим йўқола бошлади. Кейин улар кроватимни сотишди ва мен полда ухлай бошладим. Бу ҳаётимдаги энг ёмон туйғу эди”, — деб эслайди актёр.

Ўша йиллардаги ноаниқлик ёш йигит учун кучли туртки бўлди. Бўлажак актёр тўрт ёшидан жанг санъати, спорт, футбол ва гимнастика билан шуғулланди. Тайгер Брюс Ли ва Майкл Жексондан илҳомланди. Унинг қалбининг туб-тубида актёр бўлиш фикри уйғонди. Актёрнинг барча қариндош-уруғлари, дўстлари унинг ота-онасига: “Ўғлингиз улғайса, юлдуз бўлади”, — деб айтган.

Бироқ шунга қарамай, Тайгер карерасидаги бошқа вариантларни ҳам кўриб чиқди. У маълум муддат футбол билан шуғулланди. Вақт ўтиши билан Тайгер Ҳиндистонда бу йўналиш ривожланмаганини тушунди ва мактабни тугатгандан сўнг, у фильмдаги дебют ролига тайёргарлик кўриш билан банд бўлди.

Деярли уч йил давомида у ўз устида ишлади, жанг санъати билан шуғулланди, актёрлик маҳоратини оширди ва рақсга тушишни ўрганди.

Шуни таъкидлаш керакки, Шрофф бошқа нарсалар қаторида, яна бир ажойиб истеъдодга эга — у ажойиб рассом ва расмларни маҳорат билан чизади. Тайгер вегетариан, аммо тухум истеъмол қилади. У соғлом турмуш тарзини олиб боради, ичмайди, чекмайди, парҳезга риоя қилади ва гимнастика билан шугулланади, шу билан бирга актёр таэквондо бўйича 5-даражали қора камар соҳиби ҳам ҳисобланади.

Тайгер Шрофф ўзининг дебютини 2014 йилда “Севиш ҳуқуқи” фильмида ўтказди, кинокартина нафақат кассада яхши натижаларга эришди, балки унга “Йилнинг энг яхши дебюти” номинациясида энг нуфузли мукофотларни қўлга киритишига сабаб бўлди. Кўплаб мухлислар Тайгер таниқли отасига тақлид қилишга ҳаракат қилади, деб фикр юритади, аммо актёр ҳинд кино оламида ўз ўрнини эгаллашга муваффақ бўлди.

“Мен Жеки Шроффнинг ўғли эканимдан мамнунман. Аммо бу менга катта босим ўтказади. Инсонлар мени Жеки Шроффнинг ўғли деб аташларини хоҳламайман. Бунинг ўрнига уни Тайгернинг отаси сифатида билишларини истайман. Ҳа, менда катта эго бор”, — дейди актёр.  

Тез орада ёш актёр экшен-фильмларнинг асосий юлдузига айланади. Кино саноатда жуда кам актёрлар Тайгернинг трюкларини бажара олади.

“Томошабинларим тажрибаларимни яхши қабул қилишмайди. Улар мени фақат “Севги ҳуқуқи”, “Исёнчи”, “Жанг”  франшизалари қаҳрамони сифатида қабул қилади. “Йил талабаси 2” мелодрамаси чиққанида коллеж талабалари мени ҳақорат қилди. Мухлисларим бу ролни қадрламади. Демак, мен франшизалар қаҳрамониман”, — дейди актёр.

Миш-мишларга кўра, Тайгер Шрофф маълум бир муддат супермодел Анжела Жонсон билан учрашган. Кейинчалик у актриса Диша Патани билан муносабатда бўлган. Бироқ жуфтлик ҳар доим жуда яхши дўстлар эканини айтади.

Тайгернинг ўтган йили чиққан сўнгги фильми “Севиш ҳуқуқи 2” салбий изоҳларга сабаб бўлди ва кассада муваффақиятсизликка учради, бироқ актёр ҳозир бирданига учта фильм устида ишламоқда ва катта экранга хит даражасига чиқувчи фильмлар билан қайтишга умид қилмоқда.