Руҳий тушкунлик инсон ҳаётини изидан чиқариб юборади. Бундай пайтда ўзини қўлга олиш ва олдинга қадам ташлаш муҳим. Ўзбек санъаткорлари орасида ҳам руҳий тушкунликни енгиб ўтган ижодкорлар бисёр. Улар бу кунларни қуйидагича эслашади.
Акбарали Очилов
“Юлдузингни бер осмон” фильми учун саундрек куйлаган Акбарали Очиловни ҳозирги ёшлар танимаса ҳам керак. Аммо бир пайтлар унинг қўшиғи ҳит бўлган ва уларни қайта куйлаган хонандалар ҳам машҳурликка эришган. Афсуски, руҳий тушкунлик сабаб унинг бутун ҳаёти изидан чиқиб кетган. Ижтимоий тармоқларда у қаровсиз қолгани ҳақидаги видеолар ҳам тарқалганди.
— Онамнинг хоҳиши билан уйланиб фарзандли бўлганман. Бир қарашда ҳаммаси жойидадек туюларди. Аммо барибир кўнгилда қандайдир кемтик бор эди. Ўзим ёқтирган қиз билан оила қурмаганим армон бўлиб қолди. Агар яна бир марта ёш бўлиб қолиш имкони бўлса, шу хатони такрорламаган бўлардим. Фарзандларимга уй-жойни ташлаб, онам билан яшай бошладим. Онамнинг вафотидан сўнг ёлғизланиб қолдим. Ёлғизлик ҳам инсонга ўзгача илҳом бераркан. Кўп қўшиқларим ана шундай тушкунлик пайтларимда ёзилган. Аммо ҳозир ўзимни ёлғиз ҳис қилмайман. Зериксам, телефоним ва ручка билан қоғозим бор, — дейди Акбарали Очилов.
Ойдин Юсупова
Актриса Ойдин Юсупова ҳам жиддий қийинчиликларга учраган. Ҳатто унинг руҳий тушкунликка тушгани, санъатдан бутунлай кетгани ҳақида ҳам гап-сўзлар тарқалганди. У 2016 йилдан сўнг то 2022 йилга қадар бирор медиалойиҳада иштирок этгани йўқ. Бу ҳолатни дугонаси Камила Гимандинома шундай изоҳлаган.
— Ойдин дадасининг ўлимидан сўнг тушкунликка тушиб қолганди. У қийин вазиятларда ёнимда ҳамиша ёнимда турган. Аммо ўзига отасининг ўлими оғир таъсир қилди. Шунинг учун ҳам узоқ вақт ижодий танаффус қилди, — дейди актриса.
Ойдин Юсупова олти йиллик танаффусдан сўнг “Денгиз гули” ва “Ўйин” сериалларида суратга тушмоқда.
Нигора Абдуллахонова
“Афандининг қизлари” жамоасидаги иштироки билан халққа таниш бўлган актриса Нигора Абдуллахонова ота-онаси ажрашганидан сўнг ёлғизланиб қолгани ва руҳий тушкунликка тушгани ҳақида сўзлаб берди.
— Ҳар ким бахтли бўлишга ҳақли, аммо эр-хотин ажрашаётганда ўзидан ҳам кўпроқ болалари ҳақида ўйлаши керак. Болаликдан ёлғизлик ва қоронғиликдан қўрқардим. Афсуски, жуда эрта ёлғиз яшашга мажбур бўлдим. Ота-онам ажрашиб, ўзлари истагандек бахтга эришмоқчи бўлиб, оила қуришди. Албатта, бу ҳолат инсоннинг руҳий ҳолатига ҳам ўз таъсирини ўтказади. Тушундимки, бундай вазиятда атрофдагилар эмас, инсон ўз-ўзига ёрдам бериши ва ўзигагина суяниши керак экан, — дейди актриса Нигора Абдуллахонова.
Зара Ширинова
Телебошловчи Зара Ширинова эса онасининг ўлимидан сўнг тушкунликка тушгани, ҳатто уйига киришни истамай кўчада шунчаки сайр қилишга одатланиб қолган кезлари ҳақида сўзлаб берди.
— Онамдан жуда эрта айрилганман. Турган гапки, аёли вафот этганидан сўнг эркак киши уйланади. Дадам уйланганидан сўнг ҳамма ўзи билан ўзи овора бўлиб қолди. Ўша пайтларда шу қадар тушкунликка тушгандимки, ҳатто уйда ёлғиз қолишдан ҳам қўрқардим. Шунчаки кўчага чиқиб, айланиб юрардим. Чунки уйга кирсам ёлғиз эканлигим ва онамни йўқотганлигим эсимга тушаверарди. Кейинчалик ўзимни қўлга олиб, кўпроқ ишлашим кераклигини англаб етдим, — дейди Зара Ширинова.
Зуҳра Солиева
Шахсий ҳаётининг оммадан яширмайдиган актриса Зуҳра Солиева турмуш ўртоғи сабаб руҳий тушкунликка тушгани ва қандай ўзини қўлга олгани ҳақида сўзлаб берди.
— Аёл кишида тушкунликка тушиш ҳолатлари кўп бўлади. Ҳар ой гормондаги ўзгариш сабаб тушкунликка тушиши ёки арзимаган нарса билан қувониши мумкин. “Сен семизсан, ёқимсизсан!” деган таҳқирларни эшитганда, барча аёл тушкунликка тушади. Унинг устига фарзандли бўлолмай сиқилиб юрган пайтларим эди. Соғлиғим ёмонлашди, қон босимим кўтарилиб, юрагим оғрийдиган бўлиб қолди. Кўчага чиқиб, одамларга қўшилгим келмасди. Ёлғиз қолишни, атрофимдаги баъзи инсонларнинг таҳқирларини эшитишни истамасдим. Аммо кейин яхшилаб ўйлаб, бошқалар учун ўзимни қурбон қилишим керакмаслигини тушуниб етдим. Инсон ўзини ҳурмат қиладиган ва қадрлайдиган инсонлар даврасида юриши керак. Шундагина ҳаммаси яхши бўлади, — дейди актриса Зуҳра Солиева.
Илмира Раҳимжонова
Актриса Илмира Раҳимжонова онасининг эрта вафотидан кейинги руҳий тушкунлик ва унга қилинган туҳматлардан сўнг ўз жонига қасд қилмоқчи бўлгани ҳақида сўзлаб берди.
— “Балли қизлар” кўриб танловида иштирок этиб, иккинчи ўринни қўлга киритганман. Ўша ерда овқатга қўшиб помидорнинг пўсти билан еганимдан кейин мазам қочиб қолган. Бир-икки кунда ўтиб кетса керак деб ўйлагандим. Аммо бирдан мазам қочиб қолган. Ҳушимдан кетганимдан кейин Бўстонлиқдаги касалхонага олиб боришган. Кейин қишлоқда дув-дув гап бўлган, фалончини қизи фалон жойга борган экан… Энди у гапни ҳам ўзимнинг яқинларим тарқатган, “энди у қиз боламас, шу икки-уч кунда ким билади қаерларда, ким билан юрган деб туҳмат гапларни тарқатишган. Ўшанда мен қаттиқ психологик зарба олганман.
Мана шу гап-сўзлардан кейин ўзимни бир неча марта поезд тагига ташламоқчи ҳам бўлганман. Уйда ҳам бир нуқтага тикилиб ўтираверардим. Шу даражада кучли руҳий зарба олганимдан бир йилга қадар ҳеч ким билан гаплашмаганман. Икки-уч марта жонимга қасд қилмоқчи бўлганимдан кейин ўзимда куч топиб, ўлим чора эмаслигини тушуниб етганман, — дейди актриса.
Шаҳноза Отабоева
Хонанда Шаҳноза Отабоева эса ортиқча вазн туфайли руҳий тушкунликка тушгани ҳақида сўзлаб берди.
— Иккинчи фарзандим дунёга келганидан сўнг қоматимда жиддий ўзгаришлар содир бўлди. Карантин вақти ҳамма қатори менга ҳам жиддий таъсир этди. Касал бўлмаслик учун яхши овқатланиш керак экан, деб ўзимга ҳеч қандай чекловлар қўймадим. Табиийки, ортиқча вазнли инсон экранда чиройли кўринмайди. Клип суратга олгим келади, аммо кўринишим ёқмаганидан кейин фикримдан қайтаман. Тўй-ҳашамларга борганда ҳам ўзимни чеккага оладиган бўлиб қолгандим. Чунки барибир одамлар хаёлидан нималар ўтаётганини яхши билардим. Хуллас, ўша вақтда жиддий тушкунликка тушиб қолдим. Балки, бунга оиламдаги низолар ҳам сабаб бўлгандир. Ҳеч ким билан учрашгим келмайди, зарурат бўлмаса кўчага ҳам чиқишни истамасдим. Кейин ўзимни қўлга олиб, жиддий чора кўришга қарор қилдим. Бундай вазият фарзандли бўлгандан кейин бўлиши табиий ҳол. Афсуски, буни ҳамма ҳам тўғри тушунмайди, — дейди хонанда.
Мавзуга доир:
Фото: Бахтсиз севги туфайли жонига қасд қилишга уринган машҳурлар
Бахтсиз ҳодиса туфайли чиройини йўқотиб, қалб гўзаллиги билан бахт топган қизлар ҳикояси (фото)
Коко Шанел, Маурицио Гуччи. Мода оламининг қисмати фожиали якун топган вакиллари (фото)
Изоҳ (0)