Актриса Нигора Каримбоева “Сардор”, “Тоға” ва “Дада” каби фильмлардаги кўплаб фильмлардаги роллари билан томошабинларга яхши таниш. Ижодкор нафақат кинода, балки театр ва телевидениеда самарали ижод қилмоқда. 11 февраль куни 44 ёшни қаршилаган актрисанинг фаолияти ва шахсий ҳаёти билан яқиндан таништирамиз.
“Икки синглим ҳам хорижда яшайди”
Актриса оддий, ишчилар оиласида дунёга келган. Отаси педагог бўлиб, қурилиш коллежида дарс берган. Онаси эса архитекторлик бўйича таҳсил олган бўлса-да, оилавий шароити сабаб ишламаган. Актриса оиласи ва болалиги ҳақида қуйидагиларни сўзлаб берди.
— Оилада уч қизнинг тўнғичи бўлганман. Болалигим жуда гўзал ўтган. Оила таъминоти ёлғиз дадамнинг зиммасида бўлса-да, кам-кўстсиз яшаганмиз. Болалигим турли гаджетларсиз, оддий ўтган. Болалигимда жуда содда ва ишонувчан бўлганман. Бу феъл то институтни битиргунимга қадар сақланиб қолган.
Мен санъатга, сингилларим эса илмга қизиқишган. Ҳилола синглим турмуш ўртоғи билан Канадада яшаб, ўша ерда таҳсил олади. Кенжа синглим Дилдора эса оиласи билан бирга Кореяда докторлик диссертациясини ёқлади, — дейди актриса Нигора Каримбоева.
Тележурналист ва актриса бўлишни истаган
Нигора Каримбоева болалигидан нафақат санъат, балки тележурналистика соҳасига ҳам қизиққан. У институтнинг иккинчи курсида таҳсил олаётган пайтда “Илҳом” театрида саҳналаштирилган “Оқ, оқ қора лайлак” спектаклида дебют ролини ижро этган.
Кинодаги илк ролини эса 1999 йил режиссёр Ёлқин Тўйчиевнинг “Февраль” фильмида ижро этган.
“Араб йигитига ‘ишлайман’ деб шарт қўйганман”
Томошабинлар орасида Нигора Каримбоева араб миллатига мансуб инсон билан оила қургани ҳақида турли миш-мишлар тарқалган. Актриса интервьюларининг бирида бу шунчаки миш-миш экани ва ўзбек йигити билан оила қургани ҳақида айтиб ўтган.
— Интервью жуда кам бераман. Имкон қадар шахсий ҳаётим ҳақидаги саволларга жавоб бермайман. Оила шахсий қўрғон, уни оммага олиб чиқиш мумкин эмас, деб ҳисоблайман. Мақтанишга ёйманг-у, институтни тамомлаш арафасида совчи қўйган йигитлар жуда кўп эди. Улар орасида санъаткорлар ҳам, бошқа соҳа вакиллари ҳам бор эди. Аммо номзодларнинг ҳаммаси “Ишлатасизми?” деган саволимга “Йўқ” деб жавоб берган. Шунча йил ўқиб ишламайманми деб совчиларини қайтариб юборганман. Битта турмуш ўртоғим “Майли шунча йил ўқибсиз, ишлайсиз”, дегандан кейин шу инсон билан оила қуришга қарор қилганман. Эски шаҳарлик педагоглар оиласига келин бўлганман, турмуш ўртоғимнинг миллати ўзбек. Араб йигитига турмушга чиқибди деган гап-сўзларнинг тарқалишига ўғлимнинг исм-шарифи сабаб бўлган. Яъни ўғлимга қайнотамнинг исмини қўшимчасиз қўйишни истаганмиз. Жаъфар Шокир деб ҳужжатларга ёздирганимиздан кейин поликлиникага борсак, “Эрингиз покистонликми, туркми, арабми?” деган саволлар беришарди. Аввалига йўқ деб сабабини тушунтиришга ҳаракат қилардим. Кейинчалик бундай саволлардан чарчаб, гапларини тасдиқлайдиган бўлганман, — дейди Нигора Каримбоева.
“Аввал тўйда бошловчилик қилишга уялардим”
Айни кунларда ўзбек тўйларида энг талабгир бошловчи бўлган актриса ўзи истамаган ҳолда бу хизматни йўлга қўйгани ва “тўйчи” деган номдан анча йил уялгани ҳақида айтиб ўтди.
— Илгари тўйга чиқадиган ижодкорларга нисбатан муносабат бошқача бўлган. Ҳозир эса тўйлар ҳам худди концертдек ўтяпти. Шундай бўлган бўлса-да, илгари тўйларга чиқишдан уялганман. Ўзбек миллий драма театрида ишлаб юрган пайтларимда актрисаларнинг келин-салом маросимларига чиқиши урф бўлганди. Саида Раметова ва Раъно Ярашева тўйларга чиқишни таклиф қилишган. Ҳар доим рад жавобини берардим. Бир куни курсдошим Рихситилла Абдуллаев рус миллатига мансуб инсонларнинг тўйида таржимонлик қилишимни таклиф қилди. Эвазига 50 АҚШ долларига беришини эшитгандан кейин рози бўлганман. Аввалига тўйларда рус тилида бошловчилик қилардим. Беш йилга қадар тўйларга чиқишга иккиланиб юрганман. Ҳатто, буни режиссёрларга ҳам айтмасдим. Чунки яхши режиссёрлар “тўйчи” актёрларга нисбатан у қадар яхши муносабатда эмасди, — дейди актриса Нигора Каримбоева.
“Дўстимнинг қистови билан кастингга борганман”
Нигора Каримбоева телебошловчиликдаги фаолиятини “Спорт” каналида бошлаган. У МТРКга расман ишга қабул қилинишига Рихситилла Абдуллаевнинг қистови сабаб бўлгани ҳақида сўзлаб берди.
— Табиатан ёпиқ инсонман. Ўзимни ҳар ишга уриб кўришни ёқтирмайман. Бир куни дўстим Рихситилла Абдуллаев “Спорт” номли янги каналга кастинг бўлаётганини айтиб қолди. “Қўйсанг-чи, бизни барибир қабул қилишмайди”, дедим. Унинг қистови билан кастингдан ўтдик. 2004—2014 йилга қадар диктор сифатида фаолият юритдим. Ундан кейин “Ойдин ҳаёт” номли ток-шоуда бошловчилик қилдик. У ерда ҳам 6 йилга яқин ишладим. Бир ишга киришсам. Ундан кўнгил узишим жуда қийин. Моддий манфаатдан кўра ўша ишдан завқ олишим менга кўпроқ ҳузур бағишлайди, — дейди актриса.
“Бир кунда машҳур бўлиб уйғонганмиз”
Актрисанинг томошабинлар орасида машҳурликка эришишида “Сардор” сериалининг ўрни катта бўлган. Актриса сериал сабаб, машҳур бўлиб улғайгани ҳақида айтиб ўтди.
— 2000 йилда суратга олинган “Сардор” сериали катта машҳурликни олиб келган. Бу худди уйқудан машҳур бўлиб уйғонишга ўхшарди. Сериал ҳақиқатан ҳам халқ орасида кутилмаган машҳурликка эришган, — дейди актриса.
“Экрандаги қиёфам заҳар…”
Нигора Каримбоева салбий роллардан қўрқмайдиган актрисалар тоифасига киради. Аммо буни баъзи томошабинлар нотўғри тушунишлари ва “ёмон” кўриб қолишларига қуйидагича муносабат билдирди.
— Бундай ролларни ҳам кимдир ижро этиши керак. Дунёда ҳамманинг ўзига хос ниқоблари бор. Экрандаги қиёфам заҳарроқ бўлиши мумкин, аммо бу ҳаётда ҳам шундай инсонман дегани эмас. Экранда заҳар, чўрткесар аёллар ролини кўп ижро этаман. Халқдан ролларимга нисбатан негатив фикр эшитмаганман, аммо ташкилотчилардан “Яхши ролларни кўпроқ ўйнанг, сизни заҳар актриса дейишяпти”, деб кўп айтишган. Бундай фикрларга эътибор бермайман, — дейди актриса Нигора Каримбоева.
“Ўғлимнинг режиссёр бўлишини истамадик”
Актрисанинг Жаъфар исмли ёлғиз ўғли бор. У ўғлининг режиссёр бўлишига жиддий қаршилик қилгани ҳақидаги саволга қуйидагича жавоб берди.
— Ўзбекистонда эркак ижодкорларга бироз қийин. Аёл ижодкорлар ҳам асосий даромадини тўйлардан топишади. Ўғлим мактабни тамомлаш арафасида санъат институтига киришни режалаштирганди. Аммо қаршилик қилганимиз учун асосий эътиборини бошқа соҳага қаратди. Ўзим ҳақида эмас, фарзандимнинг ютуқлари билан мақтанишни яхши кўраман. У бир вақтнинг ўзида бир нечта олийгоҳга қабул қилинди. У Вестминестер университетининг IT йўналишида ўқишни истади. Ўқиш билан бирга университетда ташкил этилган “Драма тўгарагига” ҳам қатнашяпти. У дўстлари билан инглиз тилида спектакллар саҳналаштиряпти, — дейди актриса Нигора Каримбоева.
Изоҳ (0)