Самарқанд ва Жиззах вилоятида электр энергияси ва табиий газ тармоқларига ноқонуний уланиб, давлатга 350 миллион сўмдан ортиқ зарар келтирганларга жиноят иши қўзғатилди. Бу ҳақда Иқтисодий жиноятларга қарши курашиш департаменти ахборот хизмати хабар берди.
Хабарга кўра, бош прокуратура ҳузуридаги департаментнинг Каттақўрғон шаҳар бўлими томонидан ДХХ ва ИИБ ходимлари билан ҳамкорликда ўтказилган тезкор тадбирда, “Яккабоғ” маҳалласидаги уйда фуқаро М.Ш. умумий фойдаланишдаги электр тармоғига майнинг қурилмаларини ўзбошимчалик билан улаб, 81,1 минг кВт/с электр энергиясини ноқонуний сарфлагани аниқланган. Шунингдек, ушбу хонадон хўжалик биносида фуқаро А.А. 52,1 минг куб табиий газдан ноқонуний фойдаланиб, давлат ва жамият манфаатларига 144,3 миллион сўм зарар етказгани аниқланган.
Бундан ташқари, департаментнинг Ургут туман бўлими томонидан туман электр таъминоти корхонаси ходимлари билан ҳамкорликда ўтказилган терговга қадар текширувда яна бир шу каби ҳолат аниқланди. “Қ.А.” фермер хўжалиги иш бошқарувчиси умумий фойдаланишдаги электр тармоғига хўжаликнинг 2 дона сув насосини ўзбошимчалик билан улаб, 267 минг кВт/с электр энергиясидан ноқонуний фойдаланган. Бунинг оқибатида давлат ва жамият манфаатларига 120,1 миллион сўм зарар етказгани аниқланган.
Шу каби, департаментнинг Шароф Рашидов туман бўлими томонидан “Ҳудудгаз Жиззах” ГТФ шаҳар газ таъминоти бўлими ходимлари билан ҳамкорликда ўтказилган терговга қадар текширувда яна бир ҳолат аниқланган. “М.А.” оилавий корхонасига қарашли иссиқхонада газ ҳисоблаш ускунасига ташқаридан таъсир ўтказилиб, 119,1 минг куб табиий газдан ноқонуний фойдаланилганлиги оқибатида, давлат ва жамият манфаатларига 119,1 миллион сўм зарар етказилгани маълум бўлган.
Мазкур ҳолатлар юзасидан Жиноят кодексининг 185-2-моддаси (электр, иссиқлик энергияси, газ, водопроводдан фойдаланиш қоидаларини бузиш) билан жиноят ишлари қўзғатилиб, тергов ҳаракатлари ўтказилмоқда.
Изоҳ (0)