Украина армияси жангларнинг шиддатли бориши туфайли снарядлар тақчиллигига дуч келмоқда, улар “жуда тез тугамоқда”, деди Украина президенти офиси раҳбарининг ўринбосари Игор Жовква Bloomberg телеканали эфирида.
Унинг қайд этишича, Украина Қуролли кучлари одатда артиллерия ўқларидан бошланадиган қарши ҳужумга ўтиш учун нафақат узоқ масофага мўлжалланган артиллерия, ҳаво ҳужумига қарши мудофаа тизимлари, қирувчи самолётлар ва жанговар танклар, балки Ғарб ўқ-дориларини ҳам олиши керак.
“Сизда артиллерия бор, жуда кўп снарядлар бор. Ҳозир бизда ўқ-дорилар деярли нолга тенг”, — деди Жовква.
У қирувчилар ҳам бир қанча сабабларга кўра зарурлигини таъкидлади, жумладан, улар “Украина осмонида тобора кўпроқ пайдо бўлаётган” баллистик ракеталарни тутишда муҳим.
АҚШ давлат котиби Энтони Блинкен февраль ойи бошида Украина Қуролли кучлари ўзини ўзи самарали мудофаа қилиши ва Россия позицияларига қарши янги ҳужум уюштириши учун Украинага етказиб бериладиган таъминот турларини кўриб чиқаётганини айтганди. “Урушнинг бориши ўзгарган сари биз кўрсатаётган ёрдам ҳам ўзгаради”, — деб тушунтирди у. Шундан сўнг НАТО бош котиби Йенс Столтенберг алянс Россиянинг тинч мулоқот ўтказиш истагини ҳозирча кўрмаётганини ва шунинг учун Киевга ҳудудларини қайтариб олиш ва суверен давлат бўлиб қолишига ёрдам беришини таъкидлади.
Сўнгги ҳафталарда Украина расмийлари Донбассда шиддатли жанглар давом этаётгани ҳақида бир неча бор хабар берди. “Донецк вилоятида жуда қийин, шиддатли жанглар бормоқда. Аммо бу қанчалик оғир бўлмасин ва қандай босим бўлмасин, биз чидашимиз керак”, — деганди Украина президенти Владимир Зеленский февраль ойи бошида.
Изоҳ (0)