Шимолий Корея етакчиси Ким Чен Ин Корея халқ армияси ташкил этилганининг 75 йиллиги муносабати билан ўтказилган кенг кўламли парад иштирокчилари билан фотосессия чоғида мамлакат ҳарбий қудратини мустаҳкамлаш ва жадаллаштириш зарурлигини таъкидлади. Бу ҳақда Корея марказий ахборот агентлигига (KCNA) таяниб, “Интерфакс” хабар бермоқда.
Тадбирда Ким Чен Ин “борган сари шафқатсиз бўлиб бораётган империалистик зулмни куч билан бостириш” учун армия ўтмишда ҳали кузатилмаган тезликда кучайиши зарурлиги ҳақида гапирган.
KCNA маълумотларига кўра, КХДР етакчиси Шимолнинг гуллаб-яшнаши “кучли армия”га боғлиқлигини таъкидлаб, “инсон кучли бўлгандагина шон-шараф кўрсатиши”ни қайд этган.
Шунингдек, Ким Чен Ин ушбу парад “Шимолий Кореянинг обрў-эътибори ва улуғворлигини, юксак шаъни ва порлоқ келажагини янада яққолроқ намоён қилишини айтган.
Аввалроқ Жанубий Кореянинг Yonhap ахборот агентлиги хабардор манбага таяниб, Шимолий Корея 8 февраль куни Пхенянда ҳарбий парад ўтказгани ҳақида хабар берганди.
АҚШнинг Maxar Technologies космик технология фирмаси томонидан олинган сунъий йўлдош суратларига кўра, шимол парад давомида бир қатор янги баллистик ракеталарни, шу жумладан “Хвасон-17” қитъалараро баллистик ракетасини намойиш қилган. Парадни Ким Чен Ин рафиқаси ва қизи билан томоша қилгани акс этган суратлар тарқалди.
.jpg)
Ким Чен Ин ҳокимият тепасига келганидан бери Шимолий Кореяда 13 та ҳарбий парад бўлиб ўтди. Аввалгиси 2022 йил апрель ойида Корея халқ инқилобий армияси ташкил топганининг 90 йиллигига бағишлаб ўтказилганди.
Изоҳ (0)