Ўзбекистонда айрим тадбиркорларга мол-мулкни суғурта қилиш харажатларининг бир қисми қоплаб берилади. Бу ҳақда “Тадбиркорлик субъектларини тоифаларга ажратиш мезонлари ҳамда солиқ сиёсати ва солиқ маъмуриятчилигини янада такомиллаштириш чора-тадбирлари тўғрисида”ги президент фармонида белгиланди.
Фармонга кўра, 2023 йил 1 апрелдан 1 йилда бир маротаба ўрта тадбиркорлик субъектларига мол-мулкни суғурта қилиш харажатларининг 50 фоизигача, бироқ БҲМнинг 20 бараваридан ошмаган (6 миллион сўмгача) қисми қоплаб берилади.
Даромади 10 миллиард сўмдан кам бўлмаган тадбиркорлар учун давлат харидларида 20 фоизлик квота жорий этилади. Давлат харидларида энг яхши таклифларни танлаш ва тендер савдоларида иштирокчилар таклифларини баҳолашда ҚҚС суммаси инобатга олинмайди.
Бундан ташқари, юқори қўшилган қийматли мис маҳсулотларини экспорт қилувчи корхоналарнинг маҳсулотлар ишлаб чиқариш ва уларни ташқи бозорга сотиш билан боғлиқ харажатларини экспорт қийматининг 6 фоизигача қоплаш тартиби бекор қилинади.
Ҳужжатда белгиланишича, тадбиркорлар қуйидаги мезонлар асосида тоифаларга ажратилди:
Кичик тадбиркорлик субъектлари:
- якка тартибдаги тадбиркорлар;
- микрофирмалар — таъсисчилари жисмоний шахслар бўлган ҳамда жами даромади йил давомида 1 миллиард сўмгача бўлган тадбиркорлар;
- кичик корхоналар — жами даромади йил давомида 1 миллиарддан 10 миллиард сўмгача бўлган тадбиркорлар.
Ўрта тадбиркорлик субъектлари — жами даромади йил давомида 10 миллиарддан 100 миллиард сўмгача бўлган тадбиркорлар.
Йирик тадбиркорлик субъектлари – жами даромади йил давомида 100 миллиард сўм ва ундан юқори бўлган тадбиркорлар.
Изоҳ (0)