Самарқанд вилояти Тойлоқ туманида тадбиркор фойдаланган электр энергиясининг ҳисоб-китобини сунъий равишда камайтириб кўрсатиши натижасида тизимга 1,8 миллиард сўм зарар етказгани аниқланди.
Энергетика вазирлиги ҳузуридаги “Ўзэнергоинспекция” Самарқанд ҳудудий бўлими томонидан Тойлоқ туман электр таъминоти корхонасида истеъмолчиларнинг электр энергиясидан фойдаланишдаги қоидаларга риоя этилиши юзасидан текширув ўтказилди.
Ўрганиш давомида “О.Э” масъулияти чекланган жамияти томонидан фойдаланилган электр энергиясининг ҳисоб-китоби миқдори сунъий равишда камайтирилган ҳолда ҳисоботлар электр таъминоти корхонасига тақдим этиб келингани аниқланди.
Бунинг натижасида электр таъминоти корхонаси манфаатларига жами 1,8 млрд сўм зарар етказилганлиги маълум бўлди. Қоидабузар МЧЖга нисбатан белгиланган тартибда чоралар кўрилиб, тегишли ҳужжатлар ҳуқуқни муҳофаза қилувчи органларга тақдим этилди. Назорат тадбирлари давом этмоқда.
Изоҳ (0)