“Daryo” Turkiyadagi zilzila talafotlari haqida muntazam xabar berib bormoqda. Mazkur ofat tafsilotlarini aniqlashtirish maqsadida bir qancha jurnalistlar Turkiya elchixonasiga bordi. Turkiyaning O‘zbekistondagi Favqulodda va muxtor elchisi Olgan Bekar jurnalistlarga mamlakatdagi holat haqida intervyu berdi.
“Hammangizga maʼlum, Turkiyada yurakni larzaga soluvchi zilzila ro‘y berdi va O‘zbekistondan yordam jamoasi Turkiyaga jo‘nab ketdi”, deydi elchi so‘zining avvalida.
Uning taʼkidlashicha, zilzila ko‘lami juda katta, jami 200 km kvadrat maydonni qamrab olgan. Zilzila Turkiyaning o‘zida 10 ta viloyatni qamragan bo‘lsa, qo‘shni davlatlarda ham insonlar mana shu tabiiy ofatdan aziyat chekmoqdalar.
— Turkiyada zilzila talafotlarini bartaraf etish bo‘yicha ishlar davom etmoqda. Qutqaruvchilar binolar ostida qolgan odamlarni va jasadlarni chiqarib olishyapti. O‘zbekiston jamoasi ham bu bo‘yicha ishlayapti, bundan barchamiz xabardor bo‘lib turibmiz. Zilziladan talafot ko‘rgan aholi soni 15 mln atrofida, hozirda esa 100 mingga yaqin qutqaruvchilar jalb qilingan, ularning 6 ming nafari xorijdan yordamga kelganlar hisoblanadi.
“Daryo” muxbiri Turkiya elchisidan vayron bo‘lgan mehmonxonalardagi sayyohlar holati haqida so‘radi. Bunga javoban Olgan Bekar hozirda hamma vayronalar ustida 24 soat davomida qutqaruv ishlari olib borilayotgani, u yerda yashovchi sayyohlar hayoti haqida hozircha maʼlumoti yo‘qligi va statistikani kelajak ko‘rsatishini aytib o‘tdi.
Izoh (0)