Yevropa Kengashi Bosh kotibi Mariya Peychinovich-Burich Rossiya rahbariyatini javobgarlikka tortish uchun maxsus tribunal yaratishning turli variantlarini aytdi. Bu haqda Yevropeyskaya pravda xabar berdi.
Peychinovich-Burich maxsus tribunal tashkil etishning turli variantlarini taklif qildi va mustahkam qonunchilik bazasi zarurligini aytdi. U Nyurnberg xalqaro harbiy tribunali, Uzoq Sharq bo‘yicha xalqaro harbiy tribunal yoki Xalqaro jinoiy sud presedentlariga amal qilgan holda Ukraina va boshqa manfaatdor davlatlar o‘rtasida ko‘p tomonlama bitim tuzish yo‘li bilan maxsus tribunal yaratish mumkinligini ta’kidladi.
Yana bir variant Ukraina va xalqaro tashkilot, xususan, Birlashgan Millatlar Tashkiloti o‘rtasidagi kelishuv asosida maxsus tribunal tashkil etilishi bo‘lishi mumkin. BMT Xavfsizlik Kengashi rezolyutsiyasi asosida to‘g‘ridan-to‘g‘ri maxsus tribunal yaratish qonuniy jihatdan mumkin, ammo Rossiya tomonidan veto huquqidan foydalanish ehtimoli tufayli bu istiqbolli ko‘rinmaydi.
Yana bir variant Ukraina qonunchiligiga asoslangan va BMT bosh assambleyasi tomonidan ma’qullangan yoki qo‘llab-quvvatlanadigan gibrid tribunal bo‘lishi mumkin. Bunday tribunal kuchli xalqaro tarkibiy qismlarga ega bo‘lgan Ukraina huquq tizimi bilan bog‘liq bo‘lishi mumkin.
“Maxsus tribunal bilan bog‘liq har qanday faoliyat tegishli mavjud mexanizmlar, xususan, Xalqaro jinoiy sud bilan muvofiqlashtirilishi kerak”, — dedi Peychinovich-Burich.
Shuningdek, u Yevropa Kengashi Rossiyaning Ukrainaga hujumi oqibatida yetkazilgan zarar, yo‘qotish va jarohatlar to‘g‘risidagi dalillar hamda da’volarni to‘plash va hujjatlashtirish uchun reyestrni yaratishda yetakchi rol o‘ynashini aytdi.
Xususan Yevropa Kengashi Inson huquqlari bo‘yicha Yevropa sudi amaliyoti va uning qarorlarini nazorat qilish jarayonini hisobga olgan holda, bunday arizalar reyestrini ishlab chiqish uchun yaxshi imkoniyatga ega. Tashkilot allaqachon huquqiy va siyosiy maslahatlar beradi, zo'ravonlik qurbonlari, ayniqsa ayollar bilan ishlaydigan tergov ekspertlari va mutaxassislarni tayyorlaydi. Bu va boshqa tadbirlar Yevropa Kengashining Ukraina bo‘yicha 2023-2026 yillarga mo‘ljallangan harakat rejasiga kiritilgan.
Mavzuga doir: Germaniya tashqi ishlar vaziri Putinni qanday sudlash bo‘yicha sxema taklif qildi
Izoh (0)