Шимолий Корея етакчиси Ким Чен Ин қизи ва рафиқаси билан Корея халқ армияси командирларининг қароргоҳига ташриф буюрди, деб хабар бермоқда “Корея овози” радиоси.
Ташриф КХАнинг 75 йиллиги муносабати билан амалга оширилган. Қўмондонлик биносида байрам зиёфати ўтказилди, унда мамлакат раҳбари, унинг қизи ва рафиқаси Ри Сол Чжудан ташқари, Меҳнат партияси Марказий қўмитаси Сиёсий бюроси аъзолари, Миллий Мудофаа вазирлиги расмийлари, КХА бўлинмалари командирлари ва бошқа генераллар қатнашди.
Шимолий Кореянинг расмий ОАВларида одатдагидек КХДР етакчиси қизининг исми тилга олинмаган. Эълон қилинган суратларда қиз Ким Чен Иннинг қўлидан тутиб юргани, зиёфатда ўтиргани, генераллар билан суратга тушганини кўриш мумкин.
Ким Чен Иннинг қизи билан тушган сурати илк бор 2022 йил ноябрда ОАВда чоп этилганди. Ўшанда қиз янги турдаги “Хвасон-17” қитъалараро баллистик ракетанинг учирилишида иштирок этган. Ноябрь ойида Корея марказий ахборот агентлиги Ким Чен Ин ва унинг қизи ракета ва ҳарбий хизматчилар олдида тушган суратларини намойиш қилди. Январь ойида улар баллистик ракеталар омборига ташриф буюришди.
Изоҳ (0)