Германия Иқтисодиёт ва иқлимни муҳофаза қилиш вазирлиги немис ҳарбий компанияларига 178 та Леопард 1 А5 танкларини Украинага экспорт қилиш учун лицензиялар берди. Бу ҳақда Германия Мудофаа вазирлиги маълум қилди.
“Украинага ҳақиқатда нечта Леопард 1 А5 танкларининг етказилиши зарурий таъмирлаш ишларига боғлиқ”, — дейилади вазирлик хабарида.
Қайд этилишича, танкларни таъмирлаш Германиянинг ҳамкор давлатлари иштирокида амалга оширилади. Хусусан, Нидерландия ва Дания бу жараёнда иштирок этмоқда.
Германия Мудофаа вазирлиги Украинага Леопард 1 берилиши ҳақида вазирлик раҳбари Борис Писториуснинг Киевга ташрифи куни эълон қилди. Украина Мудофаа вазирлиги хабарида келтирилган Писториуснинг сўзларига кўра, 2023 йилнинг ёзигача Украина армияси 20—25 та Леопард 1 танкини, йил охирига қадар 80 тага яқин, 2024 йил давомида эса яна 100 тага яқин шундай танкни олади.
Германия Украина Қуролли кучларига Леопард 1 танкларини етказиб беришни маъқуллагани ҳақида ўтган ҳафта Германия ҳукуматининг расмий вакили Штеффен Хебештреит маълум қилганди. Немис ОАВлари етказиб бериладиган танклар сони 88 дан 160 тагача бўлишини ёзди.
Эслатиб ўтамиз, 25 январь куни Германия Леопард 2 танкларини Украинага топшириши ҳақида расман эълон қилганди. Германия ҳукумати Украина Қуролли кучлари Германиядан “биринчи қадам сифатида” Бундесвер омборларидан 14 дона Леопард 2 А6 машиналарини олишини маълум қилди.
Шу билан бирга, Bloomberg Германия канцлери Олаф Шолснинг парламентга қилган мурожаати матнига таяниб, Германия ва Украинанинг бошқа иттифоқдош давлатлари умумий ҳисобда 112 та Леопард 2 танкини Украина Қуролли кучларига топширишга рози бўлгани ҳақида ёзди.
Леопарддан ташқари, Украинага Американинг Abrams танклари ва Британиянинг Challengerълари ваъда қилинган. 27 январь куни Украинанинг Франциядаги элчиси Вадим Омелченко Ғарб давлатлари Украинага жами 321 танк бермоқчилигини айтганди.
Изоҳ (0)