Туркия ва Суриядаги зилзила қурбонлари сони 7,7 минг кишидан ошди
Туркия ва Сурияда содир бўлган даҳшатли зилзила қурбонлари сони камида 7 726 кишини ташкил қилмоқда, деб хабар берди CNN.
Туркия вице-президенти Фуат Октай мамлакатдаги зилзила оқибатида ҳозиргача камида 5 894 киши ҳалок бўлганини, 34 810 киши жароҳатланганини маълум қилди.
Унинг маълумотларига кўра, офат жойида 16 139 та гуруҳ қидирув-қутқарув ишларини олиб бормоқда.
70 дан ортиқ давлат, жумладан, Ўзбекистон қутқарув гуруҳлари ва бошқа кўринишдаги ёрдамни юборди.
Сурия давлат ахборот агентлиги SANA хабар беришича, ҳукумат назоратидаги Алеппо, Латакия, Хама, Идлиб ва Тартус вилоятларида содир бўлган зилзила оқибатида камида 812 киши ҳалок бўлган.
CNN маълумотларига кўра, Сурияда камида 1 832 киши ҳалок бўлган, 3 894 киши яраланган.
Шу билан бирга, қурбонлар ҳақидаги маълумотлар доимий равишда янгиланмоқда.
Туркияда сўнгги 80 йил ичида мамлакат учун энг катта вайронагарчиликка айланган зилзила 6 февралга ўтар кечаси содир бўлди. 7,4 магнитудали зилзила эпимаркази Газиантеп шаҳридан 26 км узоқликда жойлашган. Ер силкинишлари яна бир қанча вилоятларда, шунингдек, Сурия ва Ливанда ҳам сезилган. Шу куни Туркия ва яна 6 давлатда қатор янги зилзилалар қайд этилди.
