Туркияда зилзила қурбонлари сони 5 мингга яқинлашмоқда (видео, фото)
Туркиядаги зилзила қурбонлари сони 4 544 нафарга, жароҳатланганлар сони эса 26 725 нафарга етди. Бу ҳақда CNN хабар берди.
Туркия Фавқулодда вазиятлар бошқармасининг зилзилалар ва хавфларни юмшатиш департаменти бош директори Орхан Татар тегишли маълумотни эълон қилди.
“Сўнгги маълумотларга кўра, 4 544 киши ҳалок бўлган, 26 725 киши жароҳатланган”, — деди расмий журналистларга.
Туркия жануби-шарқида 6 февраль куни эрталаб 7,8 магнитудали зилзила юз берди ва бу 1939 йилдан бери энг кучли зилзила бўлди. Шу куни тушдан кейин яна 7,6 магнитудали зилзила қайд этилди.
Президент Ражаб Тоййиб Эрдўғон Туркияда табиий офат қурбонлари учун 7 кунлик миллий мотам, зилзиладан зарар кўрган 10 та вилоятда эса 3 ойлик фавқулодда ҳолат эълон қилди. Ҳозиргача вайроналар остидан саккиз мингдан ортиқ одам қутқариб олинган.
“Биз нафақат Туркия тарихидаги, балки бутун минтақа ва дунё тарихидаги энг катта фалокатлардан бирига дуч келдик. Барча давлат тузилмаларининг саъй-ҳаракатлари, шахсий таркиб ва техника табиий офат зонасида ишлашга сафарбар қилинган. Биринчи босқичда табиий офат зонаси аҳолисига шошилинч ёрдам кўрсатиш учун 100 миллиард лира ажратилди”, — деди Туркия президенти.
Зилзила зонасига 54 минг чодир, 102 минг каравот, энг зарур буюмлар юборилган. Беш минг тиббиёт ходими ўнта вилоят аҳолисига ёрдам бермоқда.
Эрдўғоннинг сўзларига кўра, табиий офат ҳудудида ҳозирда 53 317 нафар қутқарувчи ишламоқда. Уларнинг сони Туркия ва бошқа мамлакатлардан келган жамоалар туфайли кундан кунга ортиб бормоқда.
Мавзуга доир:
- Туркия ва Суриядаги зилзила нега ҳалокатли оқибатларга олиб келди?
- Туркия ва Суриядаги кучли зилзила: Вайроналар остидан одамлар қидирилмоқда — фоторепортаж
- Охирги 100 йил ичида содир бўлган дунёдаги энг кучли 10 та зилзила (видео+фото)
