Украинага узоқ масофага учадиган ракеталар керак, шу билан бирга Киев Ғарбдаги ҳамкорларига бундай қуролларни мамлакат ташқарисидаги нишонларга қарши қўлламаслик ҳақида кафолат беришга тайёр. Бу ҳақда Украина ҳукумати ва Еврокомиссиянинг қўшма мажлисида Украина мудофаа вазири Алексий Резников маълум қилди.
“Агар 300 километр масофага зарба бериш имкониятига эга бўлганимизда, Россия армияси мудофаани таъминлай олмай, ютқазишга мажбур бўларди. Украина сизнинг қуролларингиз Россия ҳудудига ҳужумларда иштирок этмаслиги учун ҳар қандай кафолатни беришга тайёр. Украинанинг вақтинча босиб олинган ҳудудида етарлича нишонлар бор ва биз ҳамкорларимиз билан мақсадларни мувофиқлаштиришга тайёрмиз”, — дея вазирнинг сўзларини келтирган “Ukrinform”.
Резников Ғарб давлатларини Украинада ракетага қарши мудофаани имкон қадар тезроқ ўрнатишга чақириб, Патриот ва SAМP/Т тизимлари, шунингдек, янги IRIS-Т ва NASAMS'ларни етказиб бериш зарурлигини таъкидлади.
Иттифоқчилар томонидан Украинага тақдим этилган энг узоқ масофали қуроллар бу GMLRS снарядлари билан HIMARS ёппасига ўт очувчи тизимлар бўлиб, улар тахминан 80 километр масофани босиб ўтади.
Reuters хабарига кўра, яқин орада Қўшма Штатлар Украинага ҳарбий ёрдамнинг янги пакетини эълон қилади, бу пакетга Boeing ва Saab Group компаниялари томонидан ишлаб чиқарилган GLSDB ракеталари ҳам кириши мумкин. Уларнинг учиш масофаси 150 километрни ташкил қилади. Аввалроқ Киев АҚШдан 300 километрга яқин масофага учадиган ATACMS ракеталарини бир неча бор сўраган, бироқ ҳозирча уларни олмаган.
Изоҳ (0)