Ukrainaga uzoq masofaga uchadigan raketalar kerak, shu bilan birga Kiyev G‘arbdagi hamkorlariga bunday qurollarni mamlakat tashqarisidagi nishonlarga qarshi qo‘llamaslik haqida kafolat berishga tayyor. Bu haqda Ukraina hukumati va Yevrokomissiyaning qo‘shma majlisida Ukraina mudofaa vaziri Aleksiy Reznikov ma’lum qildi.
“Agar 300 kilometr masofaga zarba berish imkoniyatiga ega bo‘lganimizda, Rossiya armiyasi mudofaani ta’minlay olmay, yutqazishga majbur bo‘lardi. Ukraina sizning qurollaringiz Rossiya hududiga hujumlarda ishtirok etmasligi uchun har qanday kafolatni berishga tayyor. Ukrainaning vaqtincha bosib olingan hududida yetarlicha nishonlar bor va biz hamkorlarimiz bilan maqsadlarni muvofiqlashtirishga tayyormiz”, — deya vazirning so‘zlarini keltirgan “Ukrinform”.
Reznikov G‘arb davlatlarini Ukrainada raketaga qarshi mudofaani imkon qadar tezroq o‘rnatishga chaqirib, Patriot va SAMP/T tizimlari, shuningdek, yangi IRIS-T va NASAMS’larni yetkazib berish zarurligini ta’kidladi.
Ittifoqchilar tomonidan Ukrainaga taqdim etilgan eng uzoq masofali qurollar bu GMLRS snaryadlari bilan HIMARS yoppasiga o‘t ochuvchi tizimlar bo‘lib, ular taxminan 80 kilometr masofani bosib o‘tadi.
Reuters xabariga ko‘ra, yaqin orada Qo‘shma Shtatlar Ukrainaga harbiy yordamning yangi paketini e’lon qiladi, bu paketga Boeing va Saab Group kompaniyalari tomonidan ishlab chiqarilgan GLSDB raketalari ham kirishi mumkin. Ularning uchish masofasi 150 kilometrni tashkil qiladi. Avvalroq Kiyev AQSHdan 300 kilometrga yaqin masofaga uchadigan ATACMS raketalarini bir necha bor so‘ragan, biroq hozircha ularni olmagan.
Izoh (0)