Шавкат Мирзиёев Қувасойдаги керамика корхонасини бориб кўрди
Шавкат Мирзиёев 2 февраль куни Фарғона вилояти Қувасой шаҳридаги Аrt soft cеramics корхонаси фаолияти билан танишди. Бу ҳақда Президент матбуот хизмати хабар қилди.
Қайд этилишича, ўтган йил декабрда иш бошлаган корхона йилига қарийб 3 миллион квадрат метр керамогранит маҳсулотлар тайёрлаш қувватига эга. Айни пайтда бу ерда 350 нафар ишчи ва мутахассис меҳнат қилмоқда.
Маҳаллийлаштириш даражаси 100 фоиз бўлгани боис товарлар хорижникидан анча арзон нархларда бозорга чиқарилмоқда. Шунингдек, уларнинг 35 фоизи Россия, Қирғизистон ва Тожикистонга экспорт қилиниши режалаштирилган.
Давлат раҳбари корхонада ва умуман Қувасой шаҳрида экспорт кўрсаткичларини ошириш муҳимлигини таъкидлаган.
“Бунинг учун чет элдаги саноат зоналари билан ҳамкорлик ўрнатиш, иш ўринларини кўпайтириш бўйича кўрсатмалар берилди”, — дейилади хабарда.
