Ўзбекистонда сўнгги 5 йил ичида ҳарбийлар учун 230та кўп қаватли уйлар қурилган
Мудофаа вазирлиги тизимида хизмат қилаётган ҳарбий хизматчилар учун 2017 йилдан 2021 йилгача ипотека кредитлари ҳисобидан 230 та кўпқаватли яшаш уйлари қурилган бўлиб, 7,2 минг нафардан зиёд ҳарбий хизматчи янги уйга кўчиб кирди. Бу ҳақда Мудофаа вазирлиги Ахборот ва оммавий коммуникациялар департаменти “Дарё”га маълум қилди.
Қайд этилишича, 2022 йилда 32 та 1,2 мингта квартирали кўп қаватли уйлар барпо этилган. “Реал эҳтиёждан келиб чиқиб жорий йилда ушбу кўрсаткични ошириш режалаштирилган”, — дейилади вазирлик хабарида.
Таъкидлаш керакки, 2017 йилгача бўлган давр мобайнида Мудофаа вазирлиги тизимида турар жой таъминоти кўрсаткичлари йилига 450 тадан ошмаган. Ўзбекистон Президентининг тегишли қарорлари билан қабул қилинган тегишли дастурлари доирасида асосида Тошкент шаҳри ва республика вилоятлари марказларида қурилиш амалга оширилган турар жойлар ҳисоби йилига ўртача 1,5 мингтадан ортиқ рақамларни ташкил этмоқда — бу олдинги даврга нисбатан қарийб уч баробарга кўп демак.
Шунингдек, 2022 йилда хизмат мажбуриятини ўтаётган пайтда ҳалок бўлган, яраланган, контузия ва майиб бўлган ҳарбий хизматчиларнинг ва айни вақтда хизматда бўлган Ватан ҳимоячиларининг 940 нафар фарзандларига олий таълим муассасаларига ўқишга кириш учун тегишли имтиёз тавсияномалар берилди. Ўтган йилнинг ёзги мавсумида ҳарбий хизматчиларнинг 2 мингга яқин фарзандлари болалар соғломлаштириш лагерларида дам олган. Ўғил болалар ва қизлар учун 2580 та тўгарак ташкил этилган, уларга 14 мингдан зиёд ёш болалар жалб этилди.
Эслатиб ўтамиз, 2022 йил августда Президент қарорига мувофиқ Ўзбекистон Қуролли Кучлари ҳарбий хизматчилари, ҳарбий хизматдан резервга (истеъфога) бўшатилган (чиқарилган) фуқаролар ва уларнинг оила аъзоларини уй-жой билан таъминлаш тартиби такомиллаштирилган.
Қарорга кўра, ҳарбий хизмат мажбуриятларини бажариш вақтида орттирилган касаллик ёки олинган жароҳати туфайли ҳарбий хизматни ўташга яроқсиз деб топилиб, резервга (истеъфога) бўшатилган (чиқарилган) Ўзбекистон Қуролли Кучлари ҳарбий хизматчиларнинг, шунингдек, ҳалок бўлган (вафот этган) ҳарбий хизматчиларнинг, уларнинг хизмат муддатидан қатъи назар, оила аъзолари уй-жой билан таъминланади.
Умумий ҳарбий хизмат муддати 20 йил бўлган ҳарбий хизматни ўтаб резервга бўшатилган фуқаролар давлат ҳисобидан турар жой билан таъминланади. Шу билан бирга, уларнинг ОТМларда ўқиш даври ҳамда давлат органлари ва ташкилотларидаги меҳнат фаолияти йиллари ҳақиқий ҳарбий хизмат йиллари даврига қўшиб ҳисобланади.
