“Рома” Николо Заниолонинг “Борнмут”га ўтишдан бош тортгани учун ғазабда.
Инглиз клуби “Рома” футболчиси учун 30+5 миллион евро ва унинг кейинги сотувидан 10% таклиф қилган. Римликлар ушбу таклифни қабул қилган, бироқ Заниолонинг ўзи “Борнмут” билан шартнома имзолашни хоҳламаган.
Рим клуби Николо ва унинг агенти томонидан қилинган ушбу ҳаракатлардан ҳафсаласи пир бўлган. Хабарларга кўра, “Рома” ярим ҳимоячига чора кўрмоқчи. Клуб Заниолони мавсум охирига қадар таркибдан четлатиш ниятида.
23 ёшли футболчи “Рома”ни ёзда тарк этишни мақсад қилган, шундагина унда битта эмас, бир нечта клубдан таклифлар бўлиши мумкин.
Рим жамоаси мухлислари Николо Заниолонинг шаънига ҳақоратли сўзлар ёзилган баннерларни илиб қўйди.
Колизейга унча узоқ бўлмаган жойга мухлислар: “Заниоло” — сотқин ва шарафсиз” сўзлари ёзилган баннерни жойлаштирган.
Кейинчалик мухлислар “Рома”нинг машғулотлар базаси дарвозасига ҳам “Қўрқоқлар, сотқинлар ва очкўзлар Тригорияни тарк этиши лозим. Фақатгина бизнинг рангимизни ҳурмат қилганларни сўзсиз қўллаб-қувватлаймиз”, деган ёзувни илиб кетишган.
Николо Заниоло 2022/23 йилги мавсум “Рома” сафида барча мусобақаларда 17 та ўйинда иштирок этиб, 2 та гол ва битта голли узатмага муаллифлик қилган.
Изоҳ (0)