“Милан” А Серияда қатор антирекордларни қайд этди

“Милан” Италия А Серияси 20-турида “Сассуоло”га 2:5 ҳисобида ютқазиб қўйди.

Миланликлар А Серия тарихида илк бор кетма-кет иккита ўйинда 4+ гол ўтказиб юбориб ютқазди. Ўтган турда жамоа “Лацио”га 0:4 ҳисобида енгилганди.

“Милан” Италия чемпионати доирасидаги уй ўйинида 1997 йилнинг апрелидан кейин илк бор ўз дарвозасидан бешта тўп олиб чиқди. 26 йил аввал “Ювентус” “Сан-Сиро”да 6:1 ҳисобида ғалаба қозонганди.

“Россонерилар” 2009 йилнинг сентябридан бери биринчи марта барча мусобақалар доирасида қаторасига учта ўйинни бой берди.

Стефано Пиоли шогирдлари 2023 йилда 7 та ўйин ўтказиб, ўз дарвозасидан 18 та тўп олиб чиқди. Бу айни вақтда топ-5 лигалар клублари орасидаги энг ёмон кўрсаткич. Амалдаги чемпион сўнгги уч ўйинда 12 та гол ўтказиб юборди.

Жамоанинг кейинги ўйини 5 февраль куни “Интер”га қарши бўлиб ўтади.