“Бугун биз қирғиз-ўзбек чегарасини делимитация қилишни якунлаяпмиз” — Садир Жапаров

Ўзбекистон—Қирғизистон давлат раҳбарлари ва ҳукумат аъзолари иштирокида бўлиб ўтган кенгайтирилган музокараларда Садир Жапаров қирғиз-ўзбек чегараси делимитацияси ҳақида гапирди.

“Бугун биз қирғиз-ўзбек чегарасини делимитация қилишни якунлаяпмиз. Бу ҳақиқатан ҳам тарихий воқеа. Биз мулоқотга ва ўзаро мақбул ечимларни излашга тайёрлигимизни намойиш этдик. Ишончим комилки, чегаралар масаласига чек қўйиб, биз келажак авлодларимиз камолотига мустаҳкам пойдевор қўямиз”, — деди Садир Жапаров.

Унинг таъкидлашича, Қирғизистон қардош Ўзбекистон билан яхши қўшничилик руҳидаги ҳамкорликни ривожлантиришга алоҳида эътибор қаратади.

“Биз учун Ўзбекистон ҳақиқий дўст ва ишончли стратегик шерикдир. Анъанага кўра, учрашув очиқ ва дўстона руҳда ўтади. Мамлакатларимиз ўртасида сиёсий қарама-қаршиликлар йўқ.

Икки мамлакат ўртасида парламентлараро алоқалар изчил ривожланиб, улар давлатлараро муносабатларда муҳим ўрин тутади”, — деди Қирғизистон президенти.