Эша Деол: Ҳинд киноси юлдузлари Дҳармендра ҳамда Ҳема Малинининг қизи нима учун уларнинг муваффақиятини такрорлай олмади?

Кўплаб мухлисларнинг айтишича, Эша Деол кино оламга фақат ота-онаси — афсонавий ҳинд актёрлари Дҳармендра ва Ҳема Малини туфайли кириб келган. Актрисанинг болалигида ҳаётида орзу қиладиган ҳамма нарсаси бор эди.

Болливуд юлдузларининг фарзанди Эша Деол 1981 йилнинг 2 ноябрида туғилган. Бўлажак актриса ёшлигидан классик рақсни ўрганган ва йигирма ёшида у оилавий анъанани давом эттириб, актриса бўлишни хоҳлаган. У илк дебютини 2002 йилда ҳинд актёри Афтаб Шивдасани билан “Ким юрагимни сўрайди?”номли романтик триллерида ижро этди.

Фильм бутунлай муваффақиятсизликка учради. Унинг иштирокидаги кейинги кинокартиналар ҳам: “Сен ҳам, мен ҳам”, “Юрак нима таклиф қилади”, “Бирор нарса айт”, “Менга ишон”, “Одамлар ташвиши” ҳам томошабинларнинг эътиборига сазовор бўлмади.

Актрисанинг чиройли ташқи кўриниши бор эди ва у дебюти учун Filmfare мукофотини қўлга киритди, бироқ у онаси каби жўшқинликка эга эмас эди. Ўша пайтда кўплаб танқидчилар агар Эша машҳур оилада туғилмаганида эди, унга шунчалик эътибор қаратилиши қийин бўлиши ҳақида ёзди.

Фильмларидаги муваффақиятсизликларга қарамай, у йилига учта релизда суратга тушишни давом эттирди ва 2006 йилда 6 та лойиҳада рол ўйнашга муваффақ бўлди. Актрисани доим онаси билан солиштиришди ва танқид қилишди, чунки Ҳема Малини даражасига эришиш осон эмас. Эша зарбаларга бардош берди.

Актриса бу ҳақда: “Мен болалигимдан актёрликка қизиқаман, лекин бу касб ҳақида кўп нарса билмайман. Ўрганишим керак бўлган кўп нарса бор. Ўзимни бу касбнинг уддасидан чиқа олмагандай ҳис қилган пайтларим бўлган. Бироқ мен ўзимни ижобий томонга ўзгартирдим. Болливудга қўшилиш — менинг қарорим, шунинг учун синаб кўришим керак”, — деб муносабат билдирган.

Орадан бир неча йил ўтгач актриса иштирокидаги фильмларга бўлган муносабат яхши томонга ўзгарди. Кейинчалик Эша Болливуд юлдузлари иштирокидаги лойиҳаларда суратга тушишни афзал кўрди. У Мани Ратнамнинг “Ёшлик” номли тамил  тилидаги сиёсий драмасида ва унинг “Тақдир чорраҳасида” ҳиндча ремейкида рол ўйнади.

У “Велосипедчилар” франшизасининг биринчи қисмида суратга тушди ва 2005 йилда машҳур бўлган “Муаммолар бўронида” комедиясида рол ўйнади.

Эша Деол 2007 йилда Cineblitz билан суҳбатда:  “Машҳур инсонларнинг фарзанди бўлиш жуда қийин. ‘Байкерлар’ фильмида суратга тушаётганимда, агар фильм муваффақиятсизликка учраса, сумкаларимни йиғиб, Болливудни тарк этаман, деб қарор қилган эдим. Яхшиямки, фильм хит даражасига чиқди”, — деб фикр билдирган.

Шунга қарамай, гўзал Эша томошабинлар қалбидан жой олган ёш ва истеъдодли актрисалар: Аиша Такия, Кангана Ранаут, Катрина Каиф, Дипика Падуконе, Анушка Шарма билан рақобатга дош бера олмади. Бу актрисалар кўпроқ мақсадга эга эди, Эша эса шон-шуҳрат масаласида хотиржам ва ҳеч қачон биринчи ўринга интилмасди.

Актрисанинг шахсий муносабатлари ҳақидаги биринчи миш-мишлар актёр Афтаб Шивдасани билан бўлди. Жуфтлик бир-бирига кўнгил қўйди, аммо Эшанинг онаси Хема Малини унинг ҳис-туйғуларини сўндирди. Болливуд юлдузи Афтабнинг севимли қизига тенг келмаслигига ишонди.

Оиласининг босими остида қолган Эша ва Афтаб ажралишди. Орадан вақт ўтиб Афтаб Нин Дусанж исмли қизга уйланди, Эша эса тадбиркор Бҳарат Тахтани билан оила қурди.

Кейинчалик оммавий ахборот воситаларида Бҳарат ва Эша бир-бирларини болалигидан билишлари, Бҳарат бошланғич мактабда ўқиб юрган пайтларида актрисани севиб қолгани, 30 ёшгача актрисанинг эътибор беришини кутганлиги ҳақида ажойиб маълумотлар пайдо бўла бошлади.

Журналистларнинг сўзларига кўра, Бҳарат Эшага содиқ бўлган, севгилисининг ҳаётидан хабардор бўлиш учун унинг синглиси Аҳана билан муносабатда бўлиб, актрисага эришишга умид қилган. Кунларнинг бирида Эша суратга олиш жараёнларидан таътил олиб, Ниагара шаршарасига дам олишга боради. Бҳарат эса актрисани ўша ерда қарши олиб, унга севги изҳор қилади. Эша бу таклифга дарров рози бўлган ва шундан кейин жуфтлик турмуш қуришди.

Актрисанинг турмуш ўртоғи ўзининг катта оиласидаги ҳаётга яхши мослашган Эшани мақтади. Катта оилада барча оила аъзолари: ота- она, холалар, амакилар, ака-укалар, жиянлар бирга яшайди.

Бҳарат билан нафақат унинг ота-онаси, балки еттита амакиваччаси, уларнинг рафиқалари ва болалари ҳам бирга яшаган. Дарҳақиқат, Ҳема Малинининг куёви қандайдир ёш актёр эмас, балки тадбиркор ва миллионернинг ўғли ва шунингдек, Эшага қулай ҳаётни таъминлай оладиган инсон эди.

Жуфтликнинг тўйи 2012 йилда бўлиб ўтди. Шундан кейин Бҳарат бизнес билан шуғулланди, Эша эса 2015 йилда шоу-бизнесга қайтиб, машҳур “Йўллар” телекўрсатувининг бошловчиси бўлди.

Эша Деол 2017 йилнинг октябрь ойида Радя исмли қизни, 2019 йилнинг ёзида иккинчи қизи Miraяни дунёга келтирди. Пандемия бошланганда Эша ўзининг “Амма Миа: онадан онага ҳикоялар, маслаҳатлар ва рецептлар” китобини ёзди.

Актриса ҳақиқатан ҳам катта экранларга қайтишни хоҳлайди, аммо ҳозирча у фақат кичик экранларга чиқди.

Эша 2022 йилда Ажай Девган партнёрлигидаги олти қисмли “Рудра: Зулмат чеккасида” номли веб-сериалида дебют қилди. У ҳозирда “Кўринмас аёл” янги веб-лойиҳасининг суратга олиш жараёнларига тайёрланмоқда.