Дунёга машҳур режиссёр Жеймс Кемероннинг «Аватар: Сув йўли» кинокартинаси шу ҳафта охирида расман 2 миллиард доллар тўплашга муваффақ бўлди. Фильмнинг касса йиғимлари 2,024 миллиард долларга етди.

Ўтган ҳафта охирида кинокартина АҚШдан умумий  598 миллион доллар, халқаро ҳудудлардан эса 1,426 миллиард доллар тўплади. Яқин келажакда «Аватар: Сув йўли» фильми «Қасоскорлар: Чексизлик уруши» (жаҳон прокатида 2,048 миллиард доллар тўплаган) ва «Юлдузлар жанги: Куч уйғонади» (касса йиғимлари 2,068 миллиард доллар)  фильмларини ортда қолдиради ва тарихдаги энг юқори даромад келтирган тўртинчи лойиҳага айланади.

«Аватар» фильмининг биринчи қисми кассада 2,922 миллиард доллар тўплаган ва ҳали ҳам умумий рейтингда етакчилик қилмоқда. Иккинчи ўринни «Қасоскорлар»нинг охирги қисми (кассада 2,797 миллиард доллар тўплаган) ва учинчи ўринни «Титаник» (дунё бўйлаб 2,187 млрд доллар йиғган) эгаллади. Февраль ойида «Титаник» кинокартинаси намойиш этилганига 25 йил тўлиши муносабати билан қайта экранларга чиқарилади.

Кемерон тарихда 2 миллиард доллар ва ундан кўпроқ даромад келтирган учта: «Аватар», «Аватар: Сув йўли ва «Титаник» кинокартиналарини суратга олган ягона режиссёрдир.

Мавзуга доир:

•  «Аватар: Сув йўли» касса йиғимлари бўйича «Ўргимчак одам» фильмини ортда қолдирди.
• Сезмагансиз ҳам: «Аватар» фильмида йўл қўйилган қўпол хатолар.
• «Аватар-2» 2022 йилнинг энг кассабоп фильми бўлди. Жеймс Кемерон кинофраншизани давом эттиришини айтди.
• Жеймс Кемероннинг «Аватар: Сув йўли» фильмида рол ўйнаган актёрлар қандай кўринишга эга? (фото).