Тошкент аэропортида янги Centrum Air авиакомпаниясининг илк самолётлари кутиб олинди. Бу ҳақда Uzbekistan Airports хабар бермоқда.
18 январь куни маҳаллий вақт билан 19:07 ва 19:18 да янги миллий авиакомпания Centrum Air’нинг иккита самолёти Тошкент халқаро аэропортига келиб қўнди.
Қайд этилишича, Литва пойтахти Вильнюсдан етиб келган самолётларни авиакомпания раҳбарияти, журналистлар ва авиаспоттерлар кутиб олган.
Иккита Airbus А320-232 Centrum Air компаниясининг биринчи йўловчи самолёти бўлди. Яқин келажакда авиаташувчи яна бир йўловчи борти — Boeing 737 ни сотиб олишни режалаштирмоқда.
Centrum Air авиакомпанияси My Freighter томонидан ташкил қилинган шўъба корхона ҳисобланади. У Дубай, Сеул, Жидда, Деҳли, Бангкок ва бошқа шаҳарларга арзонроқ парвозларни амалга оширмоқчи.
Авиакомпания аллақачон «centrum-air.com» веб-сайтига эга. My Freighter доменни 13 январь куни рўйхатдан ўтказган ва сайтдаги маълумотлар тўлдирилмоқда.
My Freighter асосчилари тадбиркорлар Ҳафизжон Ғофуров ва Абдулазиз Абдураҳмонов бўлиб, улар яна бир қанча компанияларга эгалик қилади, булар орасида Smart Soft Development ва Revochain Technology компаниялари ҳам бор.
Centrum Air томонидан дастлабки рейслар жорий йилда амлага оширилиши кутилмоқда.
Аввалроқ Humo Air Швейцария компаниясига сотилгани ҳақида хабар берилган эди.
Изоҳ (0)