«Ватан», «Мактуб», «Севинч» ва бошқа фильмларидаги роллари билан томошабинлар қалбидан жой олган актёр Бобур Йўлдошев 16 январь куни 44 ёшни қарши олди. Шу сана муносабати билан «Дарё» нашри актёр иштирокидаги энг муваффақиятли фильмлар ҳақида маълумот беради.
Санъаткорлар оиласида дунёга келган актёр
Актёр, продюсер Бобур Йўлдошев Баҳодирович 1979 йилнинг 16 январь санасида режиссёр Баҳодир Йўлдошев ва актриса Римма Аҳмедовалар оиласида дунёга келган. У 1993—1998 йиллар давомида Ўзбекистон ёшлар театрида драматургия санъати мактабида сабоқ олган. Бобур Йўлдошев кейинчалик Ўзбекистон давлат санъат ва маданият институтида ўқиган. Актёр 1992 йилдан буён театрда иш фаолиятини олиб боради. Шу йиллар давомида театрда 40 га яқин роллар ижро этди, шундан 10 таси бош роллар ҳисобланади.
Улардан Ғафур Ғуломнинг «Шум бола» романи асосида саҳналаштирилган спектаклда Шум бола ролини, Зулфиқор Мусоқовнинг «Хўжа Насриддининг биринчи муҳаббати» постановкасида ота роли ва бошқаларни мисол қилиб келтириш мумкин. Қуйида Бобур Йўлдошев рол ижро этган фильмлар билан қисқача танишинг.
«Севинч» фильми
Бобур Йўлдошев «Севинч» кинокартинасида бош қаҳрамон Дониёр ролини ижро этган. Актёрнинг бу фильмдаги партнёрлари ўзбек эстрадасининг юлдузлари Шаҳзода ва Лола бўлган.
«Ватан»
«Ватан» фильмида 2006 йилда режиссёр Зулфиқор Мусоқов томонидан суратга олинган. Фильмда Иккинчи жаҳон уруши йилларида Ўзбекистондан урушга сафарбар қилинган ўзбекистонликлар ҳаёти ҳақида ҳикоя қилинади. Фильмда бош ролларни Абдуманнон Убайдуллаев, Музаффар Саъдуллаев, Раъно Шодиева, Бобур Йўлдошев, Темур Мусоқов каби актёрлар ижро этган. Кинокартинада Бобур Йўлдошев Ҳомид образини гавдалантирган. Актёр бу фильмда салбий ролни ўйнаган бўлса ҳам томошабинларнинг эътиборига тушган.
«Ташландиқ»
«Ташландиқ» фильми режиссёр Баҳром Ёқубов томонидан 2008 йилда суратга олинган. Унда Бобур Йўлдошев бош қаҳрамонлардан бири — Дилшод ролини ижро этган. Актёр бу фильмда ҳам актриса Раъно Шодиева билан партнёр бўлган. Актёрнинг бу роли ҳам томошабинлар эътиборидан четда қолмаган.
«Мактуб»
Томошабинлар меҳрига сазовор бўлган «Мактуб» фильми актёрнинг ижодида катта ўрин эгаллайди. Бобур Йўлдошев ушбу кинокартинада учинчи бор Раъно Шодиеванинг партнёри бўлган. Актёрнинг «Мактуб» фильмидаги қаҳрамони ўз рафиқаси билан бахтли ҳаёт кечираётган кунларнинг бирида саратон касаллигига чалинганидан хабар топади. У қолган умрини бахтли кечириш мақсадида рафиқаси билан бирга вақт ўтказади. Кўп ўтмай у вафот этади, бироқ унинг рафиқаси турмуш ўртоғи вафот этганидан кейин ҳам у ёзган мактубларни олади. Кинофильмда муҳаббат, меҳр, садоқат каби тушунчалар тўлиқ ифодалаб берилган.
«Омад»
Актёр ижодидаги яна бир муваффақиятли фильмлардан бири «Омад» кинокартинаси ҳисобланади. Ушбу фильмда телебошловчи Ирода Носирова, Убайдулло Омон ҳам роль ижро этган. Актёрнинг қаҳрамони ҳаётда омадга ишонмаслигини айтади, шундан кейин омад унинг ҳаётига инсон қиёфасида кириб келади. Бош қаҳрамон кўплаб қийинчиликларга учрайди: ишидан айрилади, турмуш ўртоғи фарзанди билан ота уйига кетиб қолади, уйсиз кўчада қолиб кетади. Фильмнинг охирида Фарҳод омадга ишониш кераклигини тушуниб етади.
«Кечиккан ҳаёт»
«Кечиккан ҳаёт» фильми 2010 йилда режиссёр Аюб Шаҳобиддинов томонидан суратга олинган. Актёр ушбу фильмда қассоб йигит ролини ижро этган ва актриса Дилноза Кубаева унинг партнёри бўлган. Иккала қаҳрамон ҳам ҳаётда ўз бахтини кеч топади. Актёрнинг бу қаҳрамони жиддий феъл-атворга эга, инсонлар билан гаплашишни унча хушламайди.
«Висол»
Бобур Йўлдошев «Висол» фильмида бой, ота-онасининг гапи билан турмуш қураётган инсон ролини ижро этади. У ёқтирган қиз ролини эса хонанда, актриса Динейра ижро этган. Уларнинг тўйига бир неча кун қолганда қизнинг фикри ўзгариб, ҳаётига ҳақиқий муҳаббат кириб келади. Динейра фильмда Бобур Йўлдошев эмас, актёр Адиз Ражабов билан оила қуради.
«Тоға»
Фильм 2014 йилда суратга олинган, унда тасвирланган воқеалар ўтган асрнинг 80 йилларида Бухоро шаҳрида бўлиб ўтади. Отасиз оилада вояга етаётган Санжар ёзги таътилда тоғасининг уйига меҳмонга бориб, бир муддат у ерда яшайди. Унинг тоғаси – Жумаш ака (фильмда бу образни актёр Бобур Йўлдошев ижро этган) табиатан қувноқ, ҳазилкаш инсон. Бироқ турмуш ўртоғи билан бефарзандликдан азият чекади.
Турли юмушларда тоғасига қарашган Санжар қатъият, ирода, мақсад сари интилувчанлик, меҳнатсеварлик, ҳалоллик каби фазилатларни айнан тоғасидан ўрганади. Бу фазилатлар унга келгусида яхши инсон, моҳир шахматчи бўлиб шаклланишида асосий вазифани ўтайди.
«Геолог: Ўлимдан кучли»
Кинокартина 2014 йилда намойиш этилган. «Геолог: Ўлимдан кучли» кинофильмида геология факультетининг икки нафар битирувчиси (Адиз Ражабов ва Бобур Йўлдошев) Тошкентдан Новосибирскка амалиёт ўташ учун боради. Чет элдаги ҳаётга кўникмаган талабалар маҳаллий қароқчиларда дуч келади, отишмалардан омон қолади ва бўрилар бўлган ўрмонда тунаб қолади. Улар астойдил тирик қолишга ва вазиятлардан чиқиб кетишга ҳаракат қилади.
«Берлин — Оққўрғон»
Актёр кўплаб муҳокамаларга сабаб бўлган режиссёр Зулфиқор Мусоқовнинг «Берлин — Оққўрғон» кинокартинасида Сталин образини гавдалантирган. Фильм, асосан, Иккинчи жаҳон урушининг мудҳиш манзаралари, оғир асоратлари ҳақида ҳикоя қилади.
Мавзуга доир:
Изоҳ (0)