Селин Дион бутун дунёга ҳаётимизда юзага келадиган муаммолар бизни кучлироқ қилишини исботлади. 3 фарзанднинг бева қолган онаси йиллар давомида кўп нарсаларни бошдан кечирди. Аммо бугунги кунда муваффақиятли аёл ўз бахти учун курашишга тайёр.
У камбағал, аммо бахтли оилада туғилади
Замонамизнинг энг бой машҳурларидан бири камбағал оилада туғилган. Хонанданинг ака-ука ва опа-сингиллари кўп бўлган. «Менинг алоҳида ётоғим бўлмаган, — деб эслайди Дион. — Битта каравотда уч-тўртта бўлиб ухлардик».
Аммо қашшоқликка қарамай, Дионнинг болалиги яхши ўтади. Бу ҳақда у шундай дейди: «Ота-онам бизни севар ва доим қўллаб-қувватларди. Бундан бошқа яна нима керак?»
У ўз муҳитида эмас эди
Мактабда Дион ўзини бегонадек ҳис қиларди. У уйдан чиқишни истамаганини ва тишларидан хижолат бўлганини тан олади. Юлдузнинг айтишича, у на яхши баҳолари билан, на жозибали кўриниши билан мақтаноларди. Шу сабабли Дион учун тенгдошлари жамиятига мослашиш осон бўлмайди ва у уйда қолишни афзал кўради.
Хонанда устози ва ягона севгисидан айрилади
2016 йилда юлдуз 21 йил бирга яшаган севимли турмуш ўртоғи Рене Анжелилни йўқотади. У нафақат хонанда ҳаётининг мазмуни, балки унинг устози ва менежери ҳам эди. 1999 йилда эр-хотин биринчи марта Анжелилга саратон ташхиси қўйилганини билишганида, Дион эрига яқин бўлиш учун карьерасидан танаффус қилишга қарор қилади.
Ўлимидан 6 йил ўтиб Дион марҳум эрини ҳамон севишини тан олади: «Менда ҳаммаси яхши десам, ёлғон гапирган бўлардим. Ҳар куни сен ҳақингда ўйлайман, чунки овозимнинг акс-садосида сўзларингни эшитаман, гўё сен ёнимдасан».
Дион кўплаб оила аъзоларини йўқотади
Хонанда кўплаб оила аъзоларининг ўлимига чидашга мажбур бўлади. 2003 йилда Дионнинг меҳрибон отаси вафот этади.
«Дада, мен дунёдаги энг бахтли қизман, чунки сиздек ажойиб отам бор эди. Сиз ҳар доим менинг биринчи мухлисим бўлиб қоласиз. Мен сизни яхши кўраман!»
2016 йилда, турмуш ўртоғини йўқотганидан 2 кун ўтгач, Дион оиласида яна бир фожиали йўқотиш – акаси Дэниэл оламдан ўтади.
Бундан ташқари, 2020 йилда хонанданинг 92 ёшли онаси вафот этади. Улар жуда яқин эдилар, Дион доим ундан ўрнак оларди. Бу ҳақда у шундай деб ёзган: «Ойи, агар сизнинг ярмингизчалик кучли бўла олсам, бу менинг энг катта ютуғим бўларди».
Она бўлиш осон эмасди
Дион ЭКУ орқали ҳомиладор бўлган 3 ўғилнинг онаси. Хонанда ва унинг турмуш ўртоғи бепуштликни даволайдиган клиникага боришдан олдин 6 йил давомида фарзанд кўришга ҳаракат қилишган. Ўшанда Дион 33 ёшда эди.
10 йилдан сўнг қўшиқчи яна она бўлишни хоҳлайди — бу сафар уч нафар эгизакка. Аммо ҳомиладорлик пайтида улардан бирини йўқотади: «У акаларининг ўсишига имкон берди», — дейди хонанда.
Хонанданинг овози вақтинчалик йўқолган
2012 йилда Дион ҳар қандай қўшиқчининг энг даҳшатли фожиасига дуч келади: у овозини йўқотади. Юлдуз товуш пайчаларини яллиғлайдиган вирус билан касалланганидан кейин Вегасдаги концертларини бекор қилишга мажбур бўлади. У буни шундай деб тушунтиради: «Ўтган ҳафта қўшиқ айтишга ҳаракат қилдим, лекин овозимни мутлақо бошқара олмадим».
Аммо Дион овозини йўқотиш дунёнинг охири эмаслигини тан олади. У шундай дейди: «Менинг бахтим овозимга ёки муваффақият ва қўшиқ айтишимга боғлиқ эмас. Мен қилаётган ишимни яхши кўраман. Лекин фақат шу учун яшамайман».
Дион учун диққат марказда бўлиш осон эмас
Хонанда доимо омма эътиборида бўлиб, унинг ташқи кўриниши доимий муҳокама мавзусига айланган. Бир неча йил олдин, юлдуз ўз вазнига ғамхўрлик қилиш кераклигини ҳис қилади.
«Одамлар у жуда озиб кетган, дейишади, лекин мен касал эмасман, шунчаки қаттиқ меҳнат қиламан. Мен ҳаракат қилишни яхши кўраман. Шунинг учун хавотирга ўрин йўқ, мен яхшиман».
50 ёшга тўлганидан кейин эса юлдуз ўзининг асл қиёфасини «кашф этиш» ва ҳаётда муваффақият қозониш учун ўз тажрибаси ва барча қийинчиликларини ёқилғи сифатида ишлатганга ўхшайди. «50 ёшимда ҳаётим янгидан бошланди — ўзимни гўзал ва бахтли ҳис қиляпман». Юлдуз бошқа одамлар унинг фикрига таъсир қилишига йўл қўймаслигини тан олади. «Мен ҳаётимда ўзим қарор қабул қила оладиган даврга келдим».
2019 йилда хонанда ғурур билан шундай деганди: «Бошлаш учун ҳеч қачон кеч эмас. 51 ёшимда ўзимни карьерамнинг чўққисига чиққандек ҳис қиляпман!"
Мавзуга доир:
Изоҳ (0)