Ўзбекистон халқ артисти, маданият ва туризм вазири Озодбек Назарбеков «Ҳаёт ва хаёл йўлларида» кўрсатувига берган интервьюсида онасизлик, ҳаётда раҳбарликдан ташқари ўзининг қандай вазифалари борлиги ва ўзига қандай саволни бериши ҳақида гапириб берди.
«Кечаги тажрибалар бугунги муаммони ҳал қила олмаяпти»
Ўзимга ўзим бугунги кунда нима сабабдан маданият вазириман, деб савол бераман. Бугун ҳар бир соҳада, ҳар бир йўналишда янгиланиш, янгича муносабатлар билан турмуш тарзимизни шакллантириш жараёни кетмоқда. Бу кўз юмиб бўлмайдиган ҳақиқат. Кечаги тажрибалар бугунги муаммони ҳал қила олмаяпти. Шунинг учун айтмоқчиманки, бугун янгиланаётган Ўзбекистонда ҳамма кашфиёт қилмоқда.
«Кўпинча инсон жим бўлдим деганда руҳияти билан гаплашади»
Руҳиятимда бўлаётган ўзгаришлар кундан кунга улғаяётганимни таъкидламоқчи бўляпти. Кўпинча инсон жим бўлдим деганда руҳияти билан гаплашади. Менда ҳам шунақа жараёнлар кўп бўлади. Ҳар доим ҳар ким, ҳар нарса ўрнида тургани яхши.
«Ақл ишонадиган даражада бўлса, ишониш керак»
Инсон ижодда қалбга, яшашда ақлга бўйсуниши керак, лекин танловларда, айниқса, инсоннинг турмуш тарзида доим ақл билан маслаҳатлашишни яхши кўраман. Ақл ишонадиган даражада бўлса, ишониш керак. Хуллас, ақлга кўп вазифа юклаш керак.
«Ҳар бир ўринда вазифам бор, шуларни тўлдиришим ва жамиятда ижобий из қолдиришим керак»
Умримизнинг охиригача оқ билан қоранинг ўртасида курашиб ўтамиз. Бу нарсадан то жон узилмагунча қутула олмайди. Ҳар кун оқ-қорага дуч келиб курашамиз ва мана шуларни ажратишда оғзимиз, қўлимиз, пешонамиз куяди, бошимиз ёрилади ва аста-секин оқни оққа, қорани қорага ажратиб борамиз. Бу йўлнинг қаеридадир хато қиламиз, лекин умр ўтгани сари қулоғимизга ҳақиқатни айтиб боради.
Хоҳласак, хоҳламасак буни қулоғимизга айтгани сари биз улғайиб бораверамиз. Бугун мен ҳам шу жараёндаман, кундан кунга пишяпман. Бу зиммамга юклатилган вазифалар, бугун мен бобоман, отаман, қайнотаман, ўғилман, укаман. Ҳар бир ўринда вазифам бор, шуларни тўлдиришим ва жамиятда ижобий из қолдиришим керак. Агар бир инсон шунчалик яшаса — бахт.
«Онасиз инсонни юпун, ёмғирда соябонсиз тургандек тасаввур қиламан»
Инсонга яшашни она ўргатади, онасиз яшаш — ҳаётда яшашни ўзинг ўрган дегани. Ҳозир 50 ёшга кирдим, дўстларимнинг олдида онаси бор. Улар шу ёшга кирган бўлса ҳам, онаси учун ҳали ҳам бола, ҳар қандай вазиятда ҳам онаси қалқон бўлиб туриб беради. Онасиз инсонни юпун, ёмғирда соябонсиз тургандек тасаввур қиламан.
Ёмғир, аёз ҳаётнинг қийинчиликлари бўлса, шунақа вазиятда биринчи ўринда инсонни бағрига босадиган инсон — она. Онани қўзиларни бўридан асровчи қўриқчига ўхшатаман. Онасизлик — инсоннинг катта тоғи, суянчиғи кетиши.
«Гоҳида тўғри, гоҳида хато қиляпман»
Ўзимга кўпинча тўғри қилдиммикан, деган саволни берсам керак. Гоҳида тўғри, гоҳида хато қиляпман. Хато ҳам қиламиз, ютуқларимиз ҳам бор.
Мавзуга доир:
- «Уйга келсангиз, қулоғингизга айтаман» — маданият вазири Озодбек Назарбеков Украинадаги урушга шахсий муносабатини билдирмади.
- Озодбек Назарбеков лицензия нархи қандай белгиланиши, хонандаларнинг интернетдаги жанжали ҳамда Канизанинг «хурмача қилиқлари»га муносабати ҳақида (видео).
- Озодбек Назарбеков вазир бўлишдан кўра хонандалик яхшироқ экани ҳамда ҳозирги лавозимида қанча ойлик олиши ҳақида гапирди (видео).
- «Биз хусусий телеканалларга таъсир қила олмаймиз». Озодбек Назарбеков клипларни эфирдан олдириб ташлаш тўғрисида гапирди.
Изоҳ (0)