Алексей Арестович Украина президенти офисига штатдан ташқари маслаҳатчи лавозимидан воз кечиш тўғрисида ариза ёзди.
«Мен маданиятли хулқ-атворнинг намунасини кўрсатмоқчиман: фундаментал хато қилиндими, демак истеъфога», — деб ёзди у ижтимоий тармоқларда аризасининг суратини илова қилиб.
Арестович Днепрдаги турар жой биносига 14 январь куни келиб урилган Россия ракетаси Украина ҳаво ҳужумидан мудофаа кучлари томонидан уриб туширилгани ҳақида баёнот берганидан сўнг Украинада кескин танқид остига олинди. «Уни уриб туширишди, у подъездга қулади. Қулагандан кейин портлади », — деганди у YouTube дастурида.
Днепр мери Борис Филатов Украина Қуролли кучларидан Арестовичнинг сўзларига жавоб беришни талаб қилди, Олий Рада депутати Алексей Гончаренко уни ишдан бўшатиш учун имзо тўпланганини эълон қилди.
17 январь куни Арестович ўзи айтган гаплар учун узр сўради. «Мен жонли эфирда жиддий хатога йўл қўйдим. Томошабинлар қандай сабаб билан буни эшитгани аҳамиятсиз, лекин бундан буён ўзим айтаётган маълумотларга жиддийроқ муносабатда бўламан. Мен қурбонлар ва уларнинг яқинларидан, Днепр аҳолисидан ҳамда Россия ракетасининг турар жой биносига урилиши бўйича нотўғри талқинимдан қаттиқ хафа бўлган барчадан чин дилдан узр сўрайман», — деб ёзди у ижтимоий тармоқларда.
Маълумот учун, Днепрдаги бинога ракета ҳужуми оқибатида ҳалок бўлганлар сони 44 кишига етган.
Изоҳ (0)