Тошкент вилояти ҳокими Зоир Мирзаев айни кунда муаммолар билан юзлашаётган аҳолидан мурожаатлар келиб тушганда шахсан ҳокимларнинг ўзи жавоб бериши, халқ муаммосига биргаликда ечим топиши кераклигини таъкидлади. Бу ҳақда ҳоким ўзининг шахсий Telegram каналида маълум қилди.
Ижтимоий тармоқлар бугун катта кучга айланди. Айниқса, халқ ўз фикрини тармоқда ёзаётганда биз раҳбарлар фаол бўлишимиз, ўзимиз жавоб йўллашимиз шарт, деб ўйлайман. Мен ҳам фаолиятим давомида тармоқлардаги саҳифамда қолдирилаётган изоҳларни ўқиб, имкон топдим дегунча муносабат билдириб боришга ҳаракат қиламан. Бу ҳам халқ билан тўғридан-тўғри мулоқотнинг ўзига хос, ноёб услуби, деб ҳисоблайман, — деб ёзади Тошкент вилояти ҳокими Зоир Мирзаев ўзининг шахсий Telegram каналида.Ҳоким масъуллар билан йиғилишида туман ва шаҳар ҳокимлари аҳолига иш телефонидан ташқари, шахсий телефон рақамини ҳам бериши кераклигини айтган.
Ҳамма ҳокимга айтдик, ўзингизнинг телефонингизни ҳам, ишхонангизнинг телефон рақамини ҳам фуқарога беринг. Ташкил қилган штабларингиздан натижа бўлиши керак. Мана масалан менга ижтимоий тармоқ орқали 56 та мурожаат келиб тушяпти. Сиз берган штаб рақамига телефон қиляпмиз, лекин тушолмаяпмиз дейишяпти. Кейин фуқаро сарсон бўлиб, ҳокимият биносига боради. Шундай пайтларда ҳокимнинг ўзи жавоб бериб, вазият ҳақида тўғрисини айтиши керак. Ҳозир селекторларда ҳам фуқаро телефон қилса, олиб жавоб берса бўлади. Ҳозир фуқарога биринчи ўринда жавоб бериб, натижа қилиши керак, — дейди ҳоким.Мазкур йиғилишда вилоят ҳокими ҳудудлардан унга келиб тушаётган мурожаатларни ўқиб бериб, ечими борасида масъулларга топшириқ берган.
Шу кунларда халқимизнинг ҳар бир фикри ва мурожаатини назардан қочирмаслик ҳамда амалий ёрдам беришни ўзимнинг муқаддас бурчим, деб биламан, — дейди Зоир Мирзаев.
Изоҳ (0)