Ўзбекистонга дам олиш куни нисбатан илиқ ҳаво кириб кела бошлайди

Дам олиш кунлари совуқ аста-секин кучсизлаша бошлайди, деб хабар бермоқда «Ўзгидромет».

Маълум қилинишича, 13 январь куни Ўзбекистон ҳудуди Қозоғистоннинг шарқий ҳудудлари устида жойлашган кенг ва жуда совуқ антициклоннинг жануби-ғарбий чеккасида (периферия) жойлашган.

Республика бўйича ёғингарчилик кутилмайди, фақат Тошкент, Сирдарё, Сурхондарё вилоятларида ва Фарғона водийси вилоятларида қатламсимон булутлардан баъзи жойларда бироз қор ёғиши мумкин. Ҳаво ҳарорати куннинг иккинчи ярмида 7-12 даража совуқ бўлиши кутилмоқда.

Дам олиш кунлари республиканинг барча ҳудудлари бўйича қуруқ об-ҳаво сақланиб туради. Шанба куни ҳаво ҳарорати кечаси 12-17 даража совуқ, баъзи жойларда 20 даража совуқ бўлади. Кундузи 5-10 даража совуқ, баъзи жойларда 12 даражагача совуқ бўлади.

Якшанба куни республиканинг шимоли-ғарбий ҳудудларига Каспий денгизидан нисбатан илиқ ҳаво кириб келиши бошланади, у антициклоннинг совуқ перифериясини ортга сура бошлайди.

Якшанба куни ҳаво бироз илиқлашади. Кечаси 12-17 даража совуқ, кундузи 5-10 даража совуқ бўлади.

Республика бўйича баъзи жойларга туман тушиши кузатилади.

«Йўлларда баъзи жойларда яхмалак юзага келади. «Ўзгидромет» эҳтиёт бўлишни тавсия қилади.  13—16 январь кунлари қор кўчиши хавфи ортиши сабабли тоғли ҳудудларга бориш тавсия этилмайди», — дейилади марказ хабарида.

Мавзуга доир:

• «Ўзбекистонда аномал об-ҳаво вақтида кўриладиган чоралар бўйича норматив-меъёрий ҳужжатлар йўқ» — иқлимшунос Эркин Абдулаҳатов