Ўзбекистонда хавфли метеорологик ҳодисалар юз берганда кўриладиган чоралар бўйича аниқ норматив-меъёрий ҳужжатлар мавжуд эмас. Бу ҳақда «Ўзгидромет» мутахассиси, иқлимшунос Эркин Абдулаҳатов «Дарё» нашрига берган интервьюсида айтди.
Эркин Абдулаҳатовнинг таъкидлашича, мамлакатда об-ҳаво ҳодисаларидаги хавф таъсирини камайтириш бўйича аниқ стандартлар ишлаб чиқилиши зарур.
«Мактабда дарсларни бошлаш масаласи ижтимоий тармоқларда кўп мунозараларга сабаб бўлмоқда. Аввалига 18 январдан ўқиш бошланади, деб қарор чиқарилди. Кейин сана яна ўзгартирилди. Мактабгача ва мактаб таълими вазирлиги бу масалани ҳал қилишни ҳокимликларга топширди.
Ўзбекистонда хавфли метеорологик ҳодисалар, яъни қор, бўрон деймизми, аномал совуқ ёки иссиқми, давомли чангли бўронларда кўриладиган чоралар бўйича аниқ норматив-меъёрий ҳужжатларимиз йўқ. Бу юқоридаги нуқтада яққол кўринди. Аниқ бир ҳужжат ёки тартиб мавжуд эмас. Ким нима ва қанақа иш қилиши тизимли эмас. Албатта, ҳужжатлар ишлаб чиқилиши керак. Ўшандагина шундай ҳодисалар камроқ бўлади.
Бизда нафақат аномал совуқ, балки аномал иссиқ учун ҳам норматив-меъёрий ҳужжатлар йўқ. Ёзда ҳаво ҳарорати 41 даража иссиқ бўлганда ходимларга компенсация тўлаш, уларнинг иш вақтини бошқа вақтларга кўчириш масалаларини доимий кўтарамиз. Бу бўйича илмий тадқиқот ишлари олиб борилиши керак. Ҳар бир тармоқнинг ўз институтлари бор. Улар об-ҳаво ҳодисаларидаги хавф таъсирини камайтириш бўйича аниқ стандартлар ишлаб чиқиши лозим. Буни ҳукумат қарорлари сифатида тасдиқлаш керак», — деди мутахассис.
Аввалроқ Эркин Абдулаҳатов Ўзбекистонда охирги 20 йилликдаги энг совуқ ҳаво ҳарорати кузатилаётганини айтганди.
Изоҳ (0)