«Дарё»нинг YouTube’даги каналида Ўзбекистон халқ артисти Мурод Ражабов билан суҳбат ташкил этилди. Бир неча йилдан буён экранларда кўринмай қолган ижодкор мухлисларни қизиқтирган кўплаб саволларга жавоб берди.
Хусусий фильмлар ривожланган вақтда ОАВ бирида Мурод Ражабовнинг кунлик гонорари 500 АҚШ долларидан кам эмаслиги ва уни фильмини иштирок этиши учун режиссёрлар навбатда туриши ҳақида маълумот берилганди. Ижодкор бу фикрга ўз муносабатини билдирди.
— Ҳақиқатан ҳам шундай вазиятлар бўлган. Умуман ижодимда ўзим истамай ижро этган ролларим ҳам, фильмида суратга тушишни истамай режиссёрдан қочиб юрган пайтларим кўп бўлган. Номи чиққан, ёши мендан катта режиссёр фильмига таклиф қилади. Аммо сценарий билан танишиб, унда суратга тушгим келмаган. Фақатгина режиссёрга рад жавобини беролмаганим учун ролни ижро этишга мажбур бўлганман, — дейди Мурод Ражабов.
Актёр қандай ролларидан қониқиши ҳақида ҳам айтиб ўтди
— Баъзан ўзим суратга тушган фильмларни томоша қилсам, мазза қиламан. Боиси, мен ҳеч қачон сценарийдаги нарсани ижро этиш билан кифояланмаганман. Ҳар бир ролда албатта ўзимдан ниманидир қўшардим. Масалан, «Кичкина табиб» фильми неча йил олдин суратга олинган. Аммо томошабинлар уни ҳалигача мазза қилиб томоша қилишади. Мана шу фильмнинг ютуғи — оддий ва халқона эканлигида деб биламан. Гап сўзлари, хатти-ҳаракатлар ва ҳатто, қаҳрамонларнинг феъл-атвори ҳам оддий. Ясамалик бўлмаган фильм албатта, томошабинларга ҳам манзур бўлади,— дейди Мурод Ражабов.
Мурод Ражабов интервьюларининг бирида набираларидан бири санъатга қизиқиши ва уни актёр қилиш нияти борлиги ҳақида гапирганди. Аммо набираси негадир актёр бўлишни истамади.
— Фарзандларимнинг бирортаси санъаткор бўлишни исташмади. Набирам бу соҳага жуда қизиқарди. Аммо актёр бўламан, деб ишонч билан айтмади. Ҳозир бошқа соҳада ишлайди. Ўзида кучли иштиёқ бўлмагандан кейин уни санъаткор қилгандан фойда йўқ. Одам бир умр ишлаб пул топадиган соҳасига меҳри қўйиши керак. Бўлмаса ўртамиёна бўлиб қолаверади,— дейди Мурод Ражабов.
Мавзуга доир:
Изоҳ (0)