“Daryo”ning YouTube’dagi kanalida O‘zbekiston xalq artisti Murod Rajabov bilan suhbat tashkil etildi. Bir necha yildan buyon ekranlarda ko‘rinmay qolgan ijodkor muxlislarni qiziqtirgan ko‘plab savollarga javob berdi.
Xususiy filmlar rivojlangan vaqtda OAV birida Murod Rajabovning kunlik gonorari 500 AQSH dollaridan kam emasligi va uni filmini ishtirok etishi uchun rejissorlar navbatda turishi haqida ma’lumot berilgandi. Ijodkor bu fikrga o‘z munosabatini bildirdi.
— Haqiqatan ham shunday vaziyatlar bo‘lgan. Umuman ijodimda o‘zim istamay ijro etgan rollarim ham, filmida suratga tushishni istamay rejissordan qochib yurgan paytlarim ko‘p bo‘lgan. Nomi chiqqan, yoshi mendan katta rejissor filmiga taklif qiladi. Ammo ssenariy bilan tanishib, unda suratga tushgim kelmagan. Faqatgina rejissorga rad javobini berolmaganim uchun rolni ijro etishga majbur bo‘lganman, — deydi Murod Rajabov.
Aktyor qanday rollaridan qoniqishi haqida ham aytib o‘tdi
— Ba’zan o‘zim suratga tushgan filmlarni tomosha qilsam, mazza qilaman. Boisi, men hech qachon ssenariydagi narsani ijro etish bilan kifoyalanmaganman. Har bir rolda albatta o‘zimdan nimanidir qo‘shardim. Masalan, “Kichkina tabib” filmi necha yil oldin suratga olingan. Ammo tomoshabinlar uni haligacha mazza qilib tomosha qilishadi. Mana shu filmning yutug‘i — oddiy va xalqona ekanligida deb bilaman. Gap so‘zlari, xatti-harakatlar va hatto, qahramonlarning fe’l-atvori ham oddiy. Yasamalik bo‘lmagan film albatta, tomoshabinlarga ham manzur bo‘ladi,— deydi Murod Rajabov.
Murod Rajabov intervyularining birida nabiralaridan biri san’atga qiziqishi va uni aktyor qilish niyati borligi haqida gapirgandi. Ammo nabirasi negadir aktyor bo‘lishni istamadi.
— Farzandlarimning birortasi san’atkor bo‘lishni istashmadi. Nabiram bu sohaga juda qiziqardi. Ammo aktyor bo‘laman, deb ishonch bilan aytmadi. Hozir boshqa sohada ishlaydi. O‘zida kuchli ishtiyoq bo‘lmagandan keyin uni san’atkor qilgandan foyda yo‘q. Odam bir umr ishlab pul topadigan sohasiga mehri qo‘yishi kerak. Bo‘lmasa o‘rtamiyona bo‘lib qolaveradi,— deydi Murod Rajabov.
Mavzuga doir:
Izoh (0)