13 январь куни Ўзбекистон президенти Шавкат Мирзиёев Мудофаа вазирлигининг Марказий ҳарбий клиник госпиталига ташриф буюрди.
Госпиталда 700 ўринли даволаш бўлимлари сони 27 та, тиббий таъминот ва диагностика бўлимлари сони 11 та, таъминот бўлимлари ва хизмат турлари сони 15 та.
Муассасада 938 нафар Қуролли Кучлар ишчи ва хизматчилари фаолият кўрсатади. Жумладан, врачлар – 166 нафар, ўрта тиббиёт ходимлари (тиббий ҳамшира, лаборант, рентгенлаборант) – 421, кичик тиббий ходимлар – 115 нафар.
Госпиталда 6 нафар илмий даражали ходим ишлайди, улардан 1 нафари фан доктори, 5 нафари фан номзоди. Шунингдек, халқаро мусобақалар, давлат мукофотлари совриндорлари ҳам фаолият кўрсатмоқда.
Президентнинг 2020 йил 22-октябрдаги «Ҳарбий тиббиёт соҳасида кадрларни тайёрлашнинг сифат жиҳатидан янги тизимини ташкил этиш чора-тадбирлари тўғрисида»ги қарорига мувофиқ, мазкур факультет негизида Ўзбекистон Республикаси Қуролли Кучлари Ҳарбий тиббиёт академияси тузилди. Ушбу таълим маскани Марказий ҳарбий клиник госпитал ёнида қурилди. Президент бу ердаги шароитларни ҳам кўздан кечирди.
Академия 250 нафар талаба ва тингловчига мўлжалланган. Бу ерда бўлажак ҳарбий шифокорлар ўқитилади ҳамда тиббиёт ходимлари қайта тайёрланади. Ўқув биносида 2 та факультет, 5 та кафедра, 2 та марказ, институт ва маъмурият жойлашган. Хоналарда ўқув ва машғулотлар учун барча шароит яратилган. 186 ўринли ётоқхона ҳам бор. Давлат раҳбари академиядаги таълимнинг мазмунига алоҳида аҳамият қаратди.
«Бино ва шароитлар яхши, лекин бу ишнинг бошланиши. Энди асосийси ҳарбий тиббиётнинг мазмунини, моҳиятини тушуниб, ўқишни тўғри йўлга қўйиш керак. Бунинг учун хориж тажрибаси асосида педагогик, илмий ва амалий тизим яратиш зарур. Бу тизим бошқа тиббиёт олий ўқув юртларига муқобил ва рақобатчи, битирувчилар ўз йўналиши бўйича намуна бўлиши керак», — деди Шавкат Мирзиёев. Академияда хорижий бошқарувни жорий этиш, илк битирувчиларни Туркия ва Жанубий Корея каби мамлакатларга малака оширишга юбориш бўйича кўрсатмалар берилди.
Изоҳ (0)