Россия катта фарқ билан етакчи: Ўзбекистонда 2022 йили қайси мамлакат компаниялари кўпроқ ташкил қилинди?

Ўзбекистонда 2022 йилда энг кўп Россия капитали иштирокидаги компаниялар ташкил қилинган. Бу ҳақда Давлат статистика қўмитаси хабар бермоқда. 

Ўтган йили Ўзбекистонда янги 2 922 та чет эл компаниялари ўз фаолиятини бошлаган. Бу кўрсаткич сўнгги уч йил учун энг яхшиси бўлди. Мамлакатда фақатгина 2019 йилда 3,3 мингдан ошиқ янги хорижий компаниялар ташкил қилинган эди. 

2022 йил давомида янги ташкил этилган корхона ва ташкилотлар сони 2018 йил билан солиштирилганда 1,2 баробарга ошган.

Иқтисодий фаолият турлари кесимида энг кўп чет эл компаниялари қишлоқ, ўрмон ва балиқчилик хўжалигида фаолиятини бошлаган — 1 112 та. 

Давлатлар кесимида Ўзбекистонда фаолият кўрсатаётган Россия компаниялари қолганларга қараганда катта фарқ билан етакчилик қилмоқда — 3 156 та. Хитой (2 204) иккинчи, Туркия (2 141) эса учинчи ўринда бормоқда.

Биргина 2022 йилнинг ўзида 957 та Россия компаниялари ташкил қилинган. Бу борада иккинчи ўринда 369 та компания билан Туркия бормоқда. Учинчи ўринда бораётган Хитойда мазкур кўрсаткич 275 тани ташкил қилади. 

Нега Россия компаниялари кўпайди?

Ўзбекистонда Россия компанияларининг кескин кўпайиши ушбу мамлакат ва Украина ўртасида бўлиб ўтаётган уруш оқибатлари билан изоҳланади. 

Уруш бошлангандан кейин Ғарб давлатлари Россияга нисбатан кескин санкцияларни қўллай бошлади. Бу эса мамлакат компаниялари учун ўз бизнесини қўшни давлатларга, хусусан Марказий Осиёга кўчириш эҳтиёжини юзага келтирди.  

Туркиядаги иқтисодий вазият ҳам Ўзбекистондаги янги компаниялар сонини кескин ошишига сабаб бўлмоқда. 

2021 йилда Ўзбекистонда турк капитали иштирокида 407 янги корхона ташкил қилинди ва мамлакат бу борад биринчи ўринни эгаллади. Иккинчи ўринда Россия (356 корхона), учинчи ўринда Хитой (266) қайд этилган. 

Туркия иқтисодиёти сўнгги йилларда иқтисодий инқироз туфайли қийинчиликларни бошдан кечирмоқда. Туркиялик тадбиркорлари халқаро бозорларга чиқиш орқали буни қоплашга ҳаракат қилмоқда.