2022 йилда Жанубий Кореяда иш билан банд фуқаролар сони 816 минг кишига кўпайди, бу 22 йил ичида рекорд даражадаги йиллик ўсишдир. Бу ҳақда чоршанба куни Yonhap агентлиги ҳукумат статистикасига таяниб хабар берди.
Иш билан банд аҳолининг умумий сони 28,08 миллион кишини ташкил этади. Агентлик маълумотларига кўра, мазкур статистика коронавирус пандемияси сабаб бўлган инқироздан кейин иқтисодиётнинг тикланишини акс эттиради.
Шундай қилиб, 2022 йилда иш билан банд аҳоли сонининг ўсиши икки баробардан кўпроқни ташкил этди: 370 мингта иш ўрни яратилди. Ишсизлик даражаси йиллик ҳисобда 0,8 фоиз пунктга камайиб, 2,9 фоизни ташкил этди.
«2022 йилда нормал турмуш тарзига қайтиш, иқтисодий фаоллик ва экспортнинг ўсиши, тиббий хизматларга бўлган талабнинг ўсиши ходимлар сонининг умумий ўсишига олиб келди. Аммо мамлакатдаги ва хориждаги иқтисодий вазият туфайли, шунингдек, паст база таъсирини ҳисобга олган ҳолда йилнинг иккинчи ярмида ўсиш секинлашди», — деди Жанубий Корея миллий статистика хизмати вакили Конг Ми Сук.
Иш ўринларининг энг кўп ўсиши тиббий хизмат, ижтимоий таъминот, саноат, меҳмонхона ва ресторан бизнесида қайд этилди. Аксинча, улгуржи ва чакана савдо тармоқларида, молия секторида, суғуртада банд бўлганлар сонининг камайгани қайд этилди.
Иш билан банд бўлганлар сонининг бундай ўсиши охирги марта 2000 йилда Осиё молиявий инқирозидан тикланиш фонида қайд этилган эди.
Изоҳ (0)