Тошкент вилоятининг Оҳангарон туманидаги иккита автомобилларга газ тўлдириш компрессор шохобчаси газдан ноқонуний фойдаланиб келаётгани аниқланиб, газ тармоғидан узилди.
Энергетика вазирлиги матбуот хизматининг маълум қилишича, 10 январь куни соат 02:10 лар атрофида ишчи гуруҳ томонидан Тошкент вилояти, Оҳангарон тумани, «Ўзар» МФЙда жойлашган «Барҳаёт плюс» МЧЖга қарашли автомобилларга газ тўлдириш компрессор шохобчаси белгиланган ўчириш графигига риоя этмаган ҳолда фаолият кўрсатаётгани аниқланган.
Шунингдек, ушбу ҳудудда жойлашган «Метан транс сервис» МЧЖ ҳамда «Барҳаёт плюс» МЧЖга қарашли АГТКШларнинг газ ҳисоблагичлари белгиланган тартибга зид равишда ўрнатилгани маълум бўлган.
Мазкур шохобчаларнинг газ ҳисоблаш ускуналари экспертизадан ўтказилганда, ушбу ускуналар фойдаланишга яроқсиз деб топилиб, охирги назорат кунидан бугунги кунга қадар қайта ҳисоб-китоб қилинган.
Натижада «Барҳаёт плус» МЧЖ ва «Метан транс сервис» МЧЖларга 300 миллион сўмдан (жами 600 миллион сўм) қўшимча табиий газ ҳисобланди. Шу билан бирга, «Барҳаёт плус» МЧЖда 31 миллион сўм, «Метан транс сервис» МЧЖда 80 миллион сўм (жами 111 миллион сўм) электр энергияси учун қарздорлиги аниқланган.
Мазкур газ тўлдириш компрессор шохобчалар табиий газ тармоғидан узилган.
Мавзуга доир:
Изоҳ (0)