Қўшимча таътил даврида ҳам барча боғча ходимлари ўз иш ўринларида бўлиши керак — Мактабгача ва мактаб таълими вазирлиги

Мактабгача ва мактаб таълими вазирлиги қўшимча таътил кунларида ҳам боғча ходимлари ўз иш ўринларида бўлиши кераклигини маълум қилди.

Вазирлар Маҳкамаси баёнига асосан, 10—18 январь кунлари Ўзбекистон бўйлаб барча мактабгача таълим ташкилотлари вақтинча таътилга чиққанди. Қўшимча таътил кунларида шароитига, иситиш тизимига қараб мактабгача таълим ташкилотларининг фаолият юритишига рухсат бериш ҳудудий ҳокимлар зиммасига юклатилганди. Бунда ҳокимлик ўша тизимда кузатиладиган камчиликларга ҳам жавобгар ҳисобланади.

Шу сабабли уларнинг назоратидан яхши ўтган боғчаларгина иш фаолиятини юритиши мумкин.

Мактабгача ва мактаб таълими вазирлиги эълон қилган хабарга кўра, ҳокимлик рухсат бермаган мактабгача таълим ташкилотларида ҳам барча ходимлар иш фаолиятини доимгидек давом эттиради.

«Тизим бўйича эълон қилинган қўшимча таътил кунлари фақат тарбияланувчилар учундир. Берилган қўшимча таътил даврида мактабгача таълим ташкилотлари директорлари ўз ўрнида бўлади. Ташкилотнинг педагог кадрлари, таътил кунларидан унумли фойдаланган ҳолда, ўзининг йўналиши бўйича қўлланмалар, ўқитишнинг янги услублари, янги дидактик, ҳаракатли ўйинлар устида ишлаши лозим бўлади. Шунингдек, бошқа ходимлар ҳам ўз иш ўринларида бўлиши керак (ошпазлар бундан мустасно)», — дейилади вазирлик ахборотида.