Шундай актёрлар борки, улар юзлаб роллар ижро этган бўлса ҳам, томошабинлар хотирасида фақатгина бир образи билан сақланиб қолади. Қуйида ана шундай кино юлдузлари ҳақида сўз юритамиз.
Тэйлор Лотнер — «Сумерки»
«Сумерки» фильмига қадар Тэйлор Лотнер ҳозиргидек таниқли актёр эмас эди. Мультфильмлар қаҳрамонларига овоз бериб, оммалашмаган сериалларда кичик ролларни ижро этиб юрарди. «Сумерки»нинг биринчи қисмида фильмда бир неча дақиқали рол ўйнаган бўлса ҳам, айнан шу роли Тэйлорга улкан муваффақият олиб келди. Бироқ унинг жисмоний ҳолати талабга жавоб бермагани боис фильмнинг кейинги қисмларида Жейкоб ролини ижро этишдан маҳрум бўлди. Кинорежиссёрлар унинг номзодига шубҳа билан қарашди ва унинг ўрни актёр Майкл Копонга берилаётганди. Аммо Тэйлор қисқа вақт ичида 11 килограмм мушак вазни орттиришга муваффақ бўлди ва шу сабабли бу рол унинг ўзида қолди.
«Сумерки» нинг барча серияси тасвирга олиб тугатилмагунча Тэйлор ҳеч қайси кинода суратга тушмади. Асар тугаганидан кейин у актёрлик «бум»ни бошдан кечирди, деб айтиб бўлмайди. Мухлисларини ҳайратда қолдирган ягона нарса — у кутилмаган даражада ортиқча вазн тўплаганди.
Актёр 2016 йилгача рол ижро этди. «Тўлқинларни эгарлаб» фильмида, «Қичқириқ қироличалари» (Scream queens) сериалида рол ижро этганидан кейинги 6 йил давомида экранлардан ғойиб бўлди. Тэйлор ўтган вақт оралиғида ўз вазни устида ишлаб, 2022 йилда «Оилавий жамоа» фильми билан ижодга қайтган бўлса ҳам, танқидчилар бу картинани юқори баҳоламади.
Тоби Магуайр — «Ўргимчак одам»
Тоби Магуайр ўз карьерасини «Бу боланинг ҳаёти» фильмидан бошлаган, суратга олиш майдончасида Леонардо Ди Каприо билан дўстлашган. 9 йилдан сўнг Тоби «Ўргимчак одам» фильмида рол ўйнади ва Ди Каприо сингари жаҳон юлдузига айланди. Мабодо Лео кейинги йилларда кино оламидаги мавқейини сақлаб қолса ёки оширадиган бўлса, Тоби «Ўргимчак одам»дан сакраб ўтиб кетолмайди.
2009 йилда у «Ака-ука» фильмида рол ижро этди. Бу рол унинг карьерасига ҳеч қандай таъсир кўрсатмаган ягона яхши лойиҳа бўлиб қолди. Шунда мухлислар Тоби ҳақиқатан ҳам қобилиятли актёр эканини эслашди. Эҳтимол, бу унга «Буюк Гетсби» фильмида рол олишга қисман ёрдам берди, лекин барибир, кўп жиҳатдан, бунда Леонардо Ди Каприонинг хизмати бўлиб, у ўз дўстига тез сўнаётган мартабани қайта тиклаш учун яна бир имконият сифатида Тобига ўз ролини совға тариқасида тақдим қилган. Тоби фильмда рол ижро этди ва бу чиндан ҳам яхши ижро эди. Актёр бу имкониятни ҳам қўлдан бой берди.
Боиси Тоби атиги бир йилдан сўнг «Пиёдани қурбон қилиш» фильмида рол ўйнади ва яна экранлардан ғойиб бўлди. Кейинчалик у «Ўргимчак одам: Уйга йўл йўқ» фильми билан қайтди. Ўз карьерасини Питер Паркер билан янада кучлироқ боғлади. Тоби Магуайр ижро этадиган ролига катта эътибор қаратмаяпти, чунки унга бу рол учун жуда яхши гонорар тўланган.
Маколей Калкин — «Уйда ёлғиз»
Маколей Калкиннинг болаликдаги карьераси кўплаб ёш актёрлар орзу қиладиган аммо шу вақтнинг ўзида қўрқадиган нарсадир. «Уйда ёлғиз» фильмидаги ролига қадар Маколей бир нечта яхши фильмларда суратга тушган. «Уйда ёлғиз» ҳам улар сингари бўлиши керак эди — шунчаки ажойиб Рождество комедияси.
Ҳеч ким бу фильмнинг кассаси мисли кўрилмаган даражада муваффақиятли бўлишини тасаввур ҳам қилмаган. Қизиғи шундаки, танқидчилар бу картинани «синдиришди», аммо бу унга яқин келажакда ҳам, узоқ келажакда ҳам тўсқинлик қила олмади. Маколей ҳақиқий юлдузга айланди, кетма-кет роллар ўйнади. Учинчи қисмда рол ижро этиши мумкин эди, аммо ёш актёр рад этди. Режиссёр Крис Колумб ҳам унга эргашди. У бир неча йил ўтгач «Гарри Поттер ва ҳикматлар тоши», «Гарри Поттер ва махфий ҳужра» фильмларини суратга олади. Маколейнинг машҳурлигининг асосий камчилиги унинг ота-онаси эди.
Улар ўғлини тўғри йўналишда олиб кета олмадилар. Катта миқдордаги пул туфайли ақлдан озишди. Маколейнинг отаси ҳеч ким тўлай олмайдиган гонорарларни бекор қила бошлади. Кўп ўтмай Маколейнинг ўзи мустақил нафас олди ва 9 йил мобайнида танаффус қилишга қарор қилди. Ижодга қайтгач, Калкин ҳеч нарса қила олмади — у фақат ўзининг ёқимтой болакай қиёфаси билангина қолган эди. Ҳаётда эса қаттиқ азоб чекаётган улғайган одам эди.
Маколей яна узоқ танаффусдан сўнг 2021 йилда «Америкача даҳшатлар ҳикояси» фильмининг янги мавсумида рол ижро этиш учун қайтиб келди. Бу гал у аввалгидан анча яхши кўринди. Эҳтимол, Маколей кинода узоқ вақт қолар, аммо дастлабки имижидан халос бўлиш учун жуда кўп меҳнат қилишига тўғри келади.
Элайжа Вуд — «Узуклар ҳукмдори»
Элайжа Вуд карьерасининг аввалида «Осмон», «Скайвард», «Гек Финнинг саргузаштлари», «Меҳрибон ўғил», «Шимол», «Уруш» ва «Факультет» фильмларида «Узуклар ҳукмдори» фильми актёрлари таркибига қўшилишдан олдин суратга тушган. Питер Жексон трилогиясининг ўз муаммолари бор эди, боиси продюсерлар бу фильмларга унчалик ишонч билдиришмади. Дастлабки синовдан сўнг барча Жексон трилогияси шедевр асарга айланиши мумкинлигини англаб етди. Шундан сўнг дарҳол Фродо Баггинс ролини ижро этган Элайжа Вуднинг қудратли узукни кафтларида тутиб турган афишаси пайдо бўлди.
Фродонинг қиёфаси Элайжа Вудга шу қадар мос тушган эдики, актёр ундан халос бўлишга қанча уринмасин, бу фойда бермади. Элайжа Вуд кейинчалик «Безорилар» «Ва ҳамма нарса ёритилган» фильмларида, шунингдек, бошқа кўплаб фильмларда рол ўйнаган, аммо уларнинг барчаси Фродочалик машҳур бўлмади. Элайжа Вуд бутун дунё бўйлаб чақнаб турадиган Фрододан устун бўла оладиган ролни топа олмайди, айниқса, ташқи қиёфаси деярли ўзгармагани боис уни худди шу роли билан боғламаслик мумкин эмас.
Мэтт ЛеБланк — «Дўстлар»
«Дўстлар»нинг асосий таркибидан кимдир 18 йил давомида биринчи навбатда ўзининг машҳур ситкомдаги қаҳрамони билан боғланмаганига ишонч ҳосил қилиш қийин. Бунда энг улкан муваффақият Женнифер Энистон бўлди, чунки у омадли чиққан ўнлаб комедияларда рол ижро этганди. «Дўстлар» ситкоми орқали муваффақият қозонган, кейинчалик «Жоэй» фильмида рол ижро этган Мэтт ЛеБланкни сўнгги марта «Дўстлар: учрашув» махсус эпизодида кўриш мумкин бўлди. «Дўстлар» ситкоми ва «Жоэй» фильми ўртасида 16 йил ва бир нечта ажойиб роллар бор, холос.
Мавзуга доир:
Изоҳ (0)