Путиннинг атрофидаги «актёрлар». Россия президенти одамларни алдаяптими? — BBC суриштируви

Россия президенти Владимир Путиннинг Янги йил муносабати билан йўллаган табригида орқа фонда турган ҳарбий либосдаги гуруҳ орасида малласоч аёл омма эътиборини тортди. Бу аёл Путиннинг аввалги видео ва суратларида ҳам кўрингани ҳақида мунозаралар пайдо бўлди. Булар қанчалик асосли экани тўғрисида BBC суриштирув ўтказди ва натижаларни эълон қилди.

BBC Рус хизмати 2020 йили Путиннинг гўёки тасодифий одамлар билан гаплашгандек кўринган видеоларида аслида улар оддий одамлар эмас давлат расмийлари бўлганини аниқлаганди.

Малласоч аёл

A soldier, a sailor, a devout Christian. God moves in a mysterious way pic.twitter.com/zCDrUgXMIE

— Tadeusz Giczan (@TadeuszGiczan) December 31, 2022

Ижтимоий тармоқлар фойдаланувчилари ва The Sun, Daily Mail каби нашрлар кўрсатишича, бу малласоч аёлни Путиннинг атрофида аввал ҳам кўришган ва у турли кадрларда турфа ролда пайдо бўлган, масалан, 2016 йили балиқ овида, 2017 йили черковдаги маросимда.

Бошқа ОАВлар, масалан, Украина нашри хабарида айтилишича, бу аёл Россия Федерал гвардия хизмати ходими бўлиши мумкин.

BBC 2023 йилги суратни одам юзини таниш дастурлари ёрдамида 2016 ва 2017 йилги суратлар билан солиштирди. Дастур уларнинг ўхшашлигини мос равишда 29 ва 28 фоиз қилиб кўрсатди.

«Одатда мослик 75 фоиз ва ундан юқори бўлганда уларнинг битта одам экани ҳақида ўйлашга сабаб пайдо бўлади», — дейди Бредфорд университетида Визуал ўрганиш бўйича марказ директори, профессор Ҳасан Угаил.

Бу аёл Россия медиасида Лариса Сергухина деб аталган. Ҳар икки тадбир ҳам Новгородда ўтказилган. Аёл эса президент Путиннинг партияси «Ягона Россия» партиясидан маҳаллий кенгашга сайланган депутат бўлган.

BBC 2016 йили қайиқда олинган ва расмий эълон қилинган суратни қиёслаганда 99,8 фоиз натижа чиқди. Сергухина, шунингдек, Новгородда балиқчилик билан шуғулланувчи компания асосчиси сифатида ҳам кўрсатилган.

Янги йил табригидаги аёл эса Россия медиасида капитан ва ҳарбий шифокор Анна Сергеевна Сидоренко деб кўрсатилган. Унинг тадбирдаги юзи «Известия» газетаси онлайн эълон қилган видеодан олинган сурат билан солиштирилганда 99,5 фоиз натижа берди. Аёлнинг исми, шунингдек, Украина разведка хизмати эълон қилган рўйхатда 71 полк аъзолари орасида ҳам бор

Балиқчи

2016 йилда тўрт киши Путин билан балиқчилар қайиғида суратга тушган.

Ижтимоий тармоқлардаги хабарларда айтилишича, худди шу тўрт киши 2017 йилда черков маросимида ҳам кўринган.

BBC қайиқдаги юзларни черковдагилар билан зарур дастури орқали таққослаганда тўрт нафар эркакнинг натижаси 99 фоиздан чиққан, шунинг учун нашр журналистлари уларнинг кимлиги билан қизиққан.

Уларнинг барчаси Новгород вилоятида ишлагани ва камида уч нафари балиқчилик билан шуғулланганини тасдиқловчи далиллар топилди.

Балиқчилар бригадаси раҳбари Алексей Ляшенко (1) суратда Путин билан тушган. Бу ҳақда унинг ижтимоий тармоқлардаги аккаунтларидан, шунингдек, интернетда бригада ҳақида эълон қилинган профиллардан билса бўлади.

Худди шу профилга кўра, ушбу бригада маҳаллий «Еврохимсервис» қишлоқ хўжалиги конгломерати таркибига киради, унинг ўринбосари — Лариса Сергухина (3).

Сергей Александров (2) Россия оммавий ахборот воситаларида балиқчи сифатида тилга олинган. Унинг ижтимоий тармоқдаги профилида ҳам уни балиқчи кийимида кўриш мумкин.

Ижтимоий тармоқларда 4-рақамли шахснинг профилини топиш имкони бўлади, лекин BBC журналистлари унга мос келадиган расмни топди, унинг остида кузатувчилардан бири: «Қандай қилиб Путин билан?», деб изоҳ қолдирган. Унга: «Мен Новгородда иш жойида Путин билан бир неча марта учрашганман», деб жавоб берилган.

Евгений Ляшенко (5 ёш) — Алексейнинг ўғли. У ҳам худди шу жамоанинг бир қисми сифатида бригада профилида кўрсатилган. Алексей ва Евгенийнинг ота-ўғил эканини тасдиқловчи ижтимоий тармоқлардаги аккаунтлари бор.

Интернетда жойлаштирилган яна бир суратда икки балиқчи бир неча йил аввал Ставропол ўлкасида Путин билан учрашган ва унда улар фермер деб кўрсатилган. Аммо танланган фермерлар ва иккита балиқчининг юзлари солиштирилганда, натижа 8 фоиздан камроқ чиқди.

Музқаймоқ сотувчиси

Ўтмишдаги воқеаларнинг потенциал иштирокчиси сифатида малласочлилар белгиланишига яна бир қанча мисоллар бор, жумладан 2017 ва 2019 йиллардаги авиашоуда президент Путинга музқаймоқ бераётган аёлнинг иккита фотосуратини олайлик.

Ундаги тасвирлар ён томондан олинган, бу эса юзни аниқлашни қийинлаштиради, шунинг учун ундан хулоса чиқариб бўлмайди.

Аммо журналистлар 2019 йилда Россия телевидениесида ўзини музқаймоқ сотувчиси, деб кўрсатган аёл билан суҳбатни топди. Агар улар битта одам бўлса, бунинг ажабланарли жойи йўқ, чунки уларнинг иккаласи ҳам Путин икки йил фарқи билан иштирок этган битта авиашоуда суратга олинган.

Одамлар Путинга музқаймоқ сотган ўша аёл ўзини Россиянинг «Аэрофлот» авиакомпанияси ходими сифатида кўрсатаётганини даъво қилади, бироқ яна ўша гап, бу ҳолатда суратларни солиштириш учун юзни таниш дастури ишончли восита эмас.