Жиззах вилояти Ғаллаорол туманида 4 январь куни автомобилни юқори тезликни бошқариш оқибатида одам ўлими билан тугаган йўл-транспорт ҳодисаси содир бўлди. Бу ҳақда Йўл ҳаракати хавфсизлиги хизмати хабар қилди.
Қайд этилишича, ҳолат шу куни соат 17:30 ларда Ғаллаорол тумани ҳудудидан ўтувчи 4П-41 Ғаллаорол—Ўсмат—Бахмал автомобиль йўлининг 16-километрида юз берган. Бахмал—Ғаллаорол йўналишида ҳайдовчи О.М. (1999 йилда туғилган) Lacetti автомобилида юқори тезликда ҳаракатланиши оқибатида бошқарувни йўқотган ва йўлнинг ўнг томонига чиқиб кетиб, транспорт воситаси дарахтга урилган.
ЙТҲ оқибатида автомобиль салонида бўлган йўловчилар Н.А. (2004 йилда туғилган) олган оғир тан жароҳатлари билан воқеа жойида, К.К. (1968 йилда туғилган) шифохонада вафот этган. Шунингдек, автомобиль ҳайдовчиси ҳамда салонда бўлган яна бир йўловчи енгил тан жароҳатлари олган.
Ҳолат юзасидан Жиноят кодексининг 266-моддаси (транспорт воситалари ҳаракати ёки улардан фойдаланиш хавфсизлиги қоидаларини бузиш) 3-қисми «а» банди билан жиноят иши қўзғатилган. Ҳозирда тергов ҳаракатлари олиб борилмоқда.
Изоҳ (0)