Болалигимизда ота-онамиз уйда тайёрлаб берган ширинликлар таъми ва ҳиди билан ёдимизда қолган. Творогли печеньелар, уйда тайёрланадиган кекслар, «қуш тили» пишириқлари — бу ширинликлар болаликдаги хотираларни ёдга солади. Marie Claire нашри мазали ширинликлар рецептларини тақдим этди.
«Қуш тили» пишириғи
Керакли масаллиқлар:
- тухум — 1 дона
- сметана 20 фоизли — 100 г
- ун — 250 г
- шакар — 1 қошиқ
- ўсимлик ёғи — 250 г
- шакар кукуни —
Тухум ва шакарни кўпиртиргич ёки миксер ёрдамида аралаштириб олинг. Аралашмага сметана қўшинг. Ун қўшинг ва хамир қоринг. Кейин хамирни юпқа қатламга (тахминан 2-3 сантиметр) ёйиб, узун чизиқ шаклида кесиб олинг.
Олинган ленталарни тугун шаклида боғланг. Ичи чуқур бўлган идишда ёғни қиздиринг ва хамир бўлакларини солиб 3-4 дақиқа давомида қовуринг. Ортиқча ёғлардан халос бўлиш учун «қуш тили» пишириқларини қоғоз сочиқ устига қўйинг. Пишириқларни ликопчага солинг ва устига шакар кукунини сепинг.
Творогли печенье
Керакли масаллиқлар:
- творог 9 фоизли — 200 г
- ун — 250 г
- пишириқ кукуни — 0,5 г
- шакар — 1 стакан
- сариёғ — 110 г
- ванилинли шакар — 1,5 қошиқ
Идишга творог ва сариёғни солиб аралаштиринг. Кейин аралашмага ун, пишириш кукуни ва ванилинли шакар қўшинг, яхшилаб аралаштириб олинг ва хамир қоринг. Хамирни думалоқ шаклга келтириб олинг. Уни озиқ-овқат плёнкасига ўранг ва бир ярим соатдан икки соатгача музлаткичга қўйинг.
Шундан сўнг музлаткичдан хамирни олинг ва уни юпқа қилиб ёйинг. Кейин стакан билан кичик доиралар ҳосил қилинг, уларнинг икки ярмига ҳам яна шакар сепиш керак. Ширинликни тахминан ўттиз дақиқа давомида 180 даража ҳароратда олдиндан қиздирилган печда пиширинг.
Ширин «колбаса»
Керакли масаллиқлар:
- печенье учун қумоқ хамир — 150 г
- сариёғ — 100 г
- какао кукуни — 3 қошиқ
- ёнғоқ — 150 г
- қуюлтирилган сут — 100 г
Печеньеларни майдалагичда майдаланг, сариёғ қўшинг, аралаштиринг. Кейин хамирга какао кукуни, майдаланган ёнғоқ қўшинг ва яна яхшилаб аралаштириб олинг. Ҳосил бўлган аралашмага қуюлтирилган сутни қўшинг, колбаса шаклида ўранг, озиқ-овқат плёнкасига солинг ва бир кеча музлаткичга қўйинг. Шундан сўнг, пишириқни кичик бўлакларга бўлиб истеъмол қилиш мумкин.
Уйда тайёрланадиган «Мазурка» кекси
Керакли масаллиқлар:
- ун — 1 стакан
- тухум — 4 дона
- сметана 20 фоизли — 1 стакан
- ёнғоқ — 1 стакан
- майиз — 1 стакан
- шакар — 1 стакан
Чуқур идишда тухум, сметана ва шакарни аралаштиринг. Аралашмага ун солинг, аралаштиринг ва кейин майдаланган ёнғоқ, майиз қўшинг. Яна яхшилаб аралаштириб олинг. Олинган аралашмани иссиққа чидамли идишга қуйинг ва 40-45 дақиқа давомида 180 даражага олдиндан қиздирилган печда пиширинг — кекс пишганини ёғоч таёқча билан текширинг, акс ҳолда у куйиши мумкин. Таъбга кўра кексга шакар кукуни сепилиши ёки ванилинли музқаймоқ тўпчаларини солиб истеъмол қилиш мумкин.
Мавзуга доир:
Изоҳ (0)