Донецкда ракета зарбалари оқибатида Россиядан урушга сафарбар қилинган 400 киши ҳалок бўлгани айтилмоқда

1 январга ўтар кечаси Донецк вилоятининг аннексия қилинган қисмидаги Макеевка шаҳри ракета ҳужумига учраган, оқибатда россиялик ҳарбийлар жойлашган 19-сонли касб-ҳунар мактаби вайрон бўлган. Бу ҳақда Украина Қуролли кучларининг стратегик алоқа бошқармаси Telegram-каналида хабар берди.

Бошқарма маълумотларига кўра, зарбалар оқибатида 400 га яқин одам ҳалок бўлган, яна 300 киши жароҳатланган. Украина ОАВларининг ёзишича, касб-ҳунар мактаби биносига урушга сафарбар қилинганлар жойлаштирилган бўлган. Реадовка нашрининг хабар беришича, зарба HIMARS ёппасига ўт очувчи реактив тизимлари томонидан берилган.

Аннексия қилинган ДХР вакиллари ҳужумни тасдиқлаб, 15 киши жароҳатланганини маълум қилди.

Касб-ҳунар мактаби биносига ракета ҳужуми уюштирилгани ҳақидаги хабарларни ДХР «ахборот вазири ўринбосари» Даниил Безсонов ҳам тасдиқлади. У ўз постида ҳарбий хизматчиларни турли объектларга тарқатмасдан, уларни бир бинога жойлаштирганларни жавобгарликка тортишга чақирди.

Шунга ўхшаш постлар бошқа рус Telegram каналларида ҳам пайдо бўлди.