2023 йилда «Катта еттилик» давлатлари (G7) раиси мақомини оладиган Япония Украина президенти Владимир Зеленскийни G7 саммитида онлайн форматда иштирок этишга таклиф қилмоқчи. Бу ҳақда Nikkei газетаси хабар берди. Учрашув Хиросимада 19—21 май кунлари бўлиб ўтади.
Газетанинг ёзишича, Токио Украинадаги урушни «интенсив муҳокама қилиш» учун шароит яратмоқчи. Зеленскийнинг нутқи G7 етакчиларига мамлакатдаги вазиятни «тўғридан-тўғри билиш» имконини беради.
Япония бош вазири Фумио Кисида январь ойида G7 нинг бошқа мамлакатларига, биринчи навбатда Буюк Британия, Франция, Италия ва АҚШга ташриф буюришни режалаштирмоқда. Газетанинг ёзишича, Токио учун ассоциацияга аъзо давлатлар раҳбарларининг Украинадаги вазиятни тартибга солиш масаласи бўйича ҳаракатларини мувофиқлаштириш Тайван ва Хитой расмийлари ўртасида юзага келиши мумкин бўлган можарога тайёргарлик кўришда муҳим қадам бўлади.
2022 йил ёзида Зеленский Германия канцлери Олаф Шольцнинг 26—28 июнь кунлари Элмау шаҳрида бўлиб ўтган G7 саммитида иштирок этиш таклифини қабул қилганди. Президент, шунингдек, 11 октябрь куни, Россия ҳарбийлари мамлакат инфратузилмасига оммавий зарбалар берган куннинг эртасига G7 нинг фавқулодда онлайн саммитида иштирок этди. 13 декабрь куни Зеленский G7 мамлакатларига мурожаат йўллади, унда «тинчлик сари қадамлар» санаб ўтилган: Киевни замонавий қурол турлари билан таъминлаш, молиявий ва энергетика барқарорлигини сақлашга ёрдам бериш, шунингдек, «тинчлик формуласи» мавзусини муҳокама қилиш учун саммит чақириш.
Изоҳ (0)