Дания разведкаси Россия президенти Владимир Путин қабул қилаётган гормонал дориларнинг таъсирида Украинага уруш бошлаган бўлиши мумкинлигини маълум қилди. Бу ҳақда Berlingske хабар берди.
Дания ҳарбий разведкасида Россия ҳақида маълумот тўплаш гуруҳини бошқарувчи Ёаким бу бўйича маълумот берган. «Улуғворлик иллюзияси — Путин қабул қилган гормонал дориларнинг маълум ён таъсиридан бири. Буни аниқ айта олмайман, лекин, бу унинг Украинада уруш бошлаш қарорига таъсир ўтказган бўлиши мумкин», — дейди разведка ходими.
Тахминларга кўра, Путин саратон касаллиги туфайли гормонал даволанишдан ўтган. Россия президенти матбуот котиби Дмитрий Песков расман Путин саратон касаллигига чалинмаганини таъкидлаб келади. Ёаким президентнинг юзида гормонал даволаниш амалга ошганини кўрсатувчи белгилар борлигини айтган.
Ўз навбатида, Дания разведка хизмати Путиннинг саратон касалликдан азият чекаётганига ишонмайди. Аксинча, бахтсиз ҳодисалар, дзюдо ва хоккей пайтида олинган кўплаб жароҳатлардан кейин Путинда кучли сурункали оғриқлар юзага келган деган қараш бор. Ижтимоий тармоқларда эътибор қаратилган воқеалар (Путиннинг Қизил майдонда оқсоқланиб юриши, музокаралар чоғида столни ушлаб олиши ва ҳоказо) шу билан изоҳланади.
«Шуниси қизиқки, бу сурункали оғриқ бўлиб, Путин анчадан бери ундан азият чекмоқда. Шунинг учун у ўтирганида нарсаларни маҳкам ушлашга интилади. Бу оғриқни енгиллаштиради», — дейди Ёаким.
Разведкачи ўз маълумотлари манбаларини ошкор қилмаган, бироқ гап фақат Россия президенти иштирокидаги видеоёзувларни ўрганиш ҳақида кетаётганига ишонтирган.
Мавзуга доир:
Изоҳ (0)