29 декабрь куни Россия ҳарбийлари Украинага янги ракета зарбаларини берди. Эрталаб бутун мамлакат ҳудудида ҳаво тревогаси эълон қилинди.
«Жануб» тезкор қўмондонлиги хабар қилишича, Қора денгизга иккита сув усти ракета ташувчи кемалари жанговар навбатчиликка чиққан ва 16 та «Калибр» қанотли ракеталарини учиришга тайёрланган.
Украина ОАВлари ва Telegram-каналлари маълумотларига кўра, Киев, Чернигов, Одесса ва Житомир вилоятларида ҳаво ҳужумига қарши мудофаа тизимлари ишга тушган.
Киев шаҳрида ва вилоятида портлаш овозлари эшитилган. Маҳаллий пабликлар хабарларига кўра, Киев осмонида ракета уриб туширилган. Шаҳар маъмурияти ҳаво ҳужумига қарши мудофаа тизими ишга тушганини тасдиқлади ва аҳолини саросимага тушмасдан, бошпаналарда сақланишга чақирди.
Одессада ва Суми вилоятида ҳам биттадан ракета уриб туширилган.
Украина президенти офиси раҳбари маслаҳатчиси Алексей Арестович даъво қилишича, Россия армияси 29 декабрь куни 100 дан ортиқ ракеталар билан бир неча марта ҳужум қилишни режалаштирмоқда.
Октябрь ойи бошидан бери Россия Мудофаа вазирлиги Украинанинг ҳарбий ва энергетика инфратузилмасига мунтазам ракета зарбалари бериб келмоқда. Ҳужумларда Россия Эрондан сотиб олган дронлардан ҳам фойдаланмоқда.
Россия ҳарбийлари 27 декабрь куни Херсондаги касалхонанинг туғруқ бўлимини ўққа тутди, 24 декабрь куни эса улар Херсонда, жумладан, иккита тиббиёт муассасасига зарба берганди.
Украина ички ишлар вазири ўринбосари Евгений Енин маълум қилишича, Россия зарбалари оқибатида мамлакатда февралдан буён жами 35 мингта объект зарар кўрган, шуларнинг 702 таси муҳим инфратузилма объектларидир.
Изоҳ (0)