Соғлиқни сақлаш вазири Самарқандда "Док-1 Макс" препарати қабул қилгач вафот этган 18 нафар боланинг ота-онасига ҳамдардлик билдириб, ишга алоқадор барча шахслар жавобгарликка тортилишини маълум қилди.
Фото: “Дарё” / Мадина Нурман
“Док-1 Макс” дорисининг меъёридан ортиқча истеъмоли натижасида бу дунёдан 18 фарзандларимиз кўз юмди. Уларнинг ота-оналарига Соғлиқни сақлаш вазирлиги ва барча тиббиёт ходимлари номидан таъзия билдирамиз.
Мазкур маълумот вилоят тиббиёт ходимлари томонидан вазирликдан яширилган. Ушбу маълумотга эга бўлишимиз билан ўша куннинг ўзидаёқ махсус ишчи гуруҳ тузиб, ҳуқуқни муҳофаза қилиш органлари билан биргаликда ҳар бир ҳолат ўрганилди.
Ҳозирги кунда дори воситасини республикада рўйхатдан ўтган, мамлакатга олиб келган ва сотувида иштирок этган бир қанча шахслар ҳуқуқни муҳофаза қилиш органлари томонидан ҳибсга олинди. Ушбу ҳолатга панжа орасидан қараган, ўз вазифасига лоқайдлик билан ёндошган масъул тиббиёт ходимлари лавозимидан озод қилинди.
Минг афсуски, болажонларни ҳаётга қайтармайди, албатта. Фарзанд доғидан куйган ота-оналарнинг дардини енгиллаштирмайди. Ушбу ишга алоқадор фармасевтика ходими бўладими, дорихона ходими бўладими, шифокор бўладими ҳали ҳаммаси жавобгарликка тортилади. Бунга ҳеч қандай муроса бўлиши мумкин эмас”, — деди Беҳзод Мусаев.
Мавзуга доир: ДХХ “Док-1 Макс” препарати билан боғлиқ ҳолат юзасидан жиноят иши қўзғатди
Изоҳ (0)