Жорий йил I ярмида 2024 йил мос даврига нисбатан олтин экспорти 57,2 фоизга, хорижга газ сотуви 50,5 фоизга кўпайди. Бу ҳақда Статистика қўмитаси таҳлилида қайд этилган.
Хитой энг катта ҳамкор
2025 йил I ярмида Ўзбекистон ташқи савдо айланмаси ҳажми 37 млрд долларга етди. Бу 2024 йил мос даврига нисбатан 5,1 млрд долларга (16,1 фоиз) кўп.
Ярим йилда 16,9 млрд долларлик экспорт (ўсиш 29,1 фоиз), 20,1 млрд долларлик импорт (ўсиш 7 фоиз) амалга оширилган. Ташқи савдо тақчиллиги 3,24 млрд доллар миқдорида шаклланган.
Хитой Ўзбекистон ташқи савдосида биринчиликни эгаллашда давом этмоқда. Олти ой давомида мазкур мамлакат билан 6 млрд 556 млн долларлик экспорт-импорт операциялари амалга оширилган. Таққослаш учун, ўтган йил мос даврида бу кўрсаткич 5,9 млрд доллар эди.
Ярим йил мобайнида Россия билан ҳам товар айланмаси ҳажми 6 млрд доллардан ошди (ўтган йил мос даврида 5,7 млрд доллар).
Учинчи йирик ҳамкор давлат Қозоғистон бўлиб, Ўзбекистон қўшни мамлакат билан 1,34 млрд долларлик олти-сотди қилган. 2024 йил I ярмида бу кўрсаткич 1,45 млрд доллар бўлган.
Умуман олганда, Ўзбекистоннинг 17,7 фоиз ташқи савдоси Хитой, 16,3 фоизи Россия, 6 фоизи Қозоғистон ҳиссасига тўғри келди.
Олтин ва газ экспорти кўпайди
Жорий йил I ярмида Ўзбекистон экспорт тушумларининг 38,4 фоизи олтин сотувидан келган. Мамлакат олти ойда 6,6 млрд долларлик (ўсиш 57,2 фоиз) қимматбаҳо металл экспорт қилди.
Республика экспорти ҳажмининг деярли тўртдан бир қисми (24 фоиз) хизматлар сотувига тўғри келган. Ярим йил ичида мамлакат 4,05 млрд долларлик хизматлар экспорт қилган (2024 йил мос даврида 3,14 млрд доллар).
Январь—июнь ойларида чет элга 1,26 млрд долларлик тўқимачилик маҳсулотлари сотилган. Бу кўрсаткич умумий экспортнинг 7,5 фоизини ташкил этади. Бироқ 2024 йил мос даврига нисбатан мазкур йўналишдаги ташқи савдолар 17 фоизга қисқарди.
Ўзбекистон экспортининг 734 млн долларини (4,3 фоиз) минерал ёқилғи ва ёғлаш мойлари сотуви ташкил этган (ўтган йил I ярмида 585,6 млн доллар). Жумладан, олти ойда мазкур туркумга кирувчи табиий газ экспорти 50,5 фоизга кўпайди. Яъни мамлакат бу даврда хорижга 354,9 млн долларлик газ сотди. Ўз навбатида электр токи экспорт ҳажми ҳам 52,5 фоиз ошиб, 100,6 млн долларга етди.
Ҳисобот даврида озиқ-овқат маҳсулотлари ва тирик ҳайвонлар экспорти ҳажми 1,2 млрд долларни ташкил этди (ўтган йил мос даврида 846,5 млн доллар). Бу умумий экспортнинг 7,2 фоизига тенг.
Автомобиль импорти камайди
Ярим йил мобайнида Ўзбекистонга энг кўп импорт қилинган маҳсулотлар доимгидек машиналар ва транспорт асбоб-ускуналари бўлди — 6,6 млрд доллар. Аммо мазкур маҳсулотлар импорти ўтган йил мос давридагига қараганда 2,6 фоизга камайган.
Олти ойда 1,5 млрд долларлик автомобиллар импорти амалга оширилган. Бу 2024 йил дастлабки ярмига нисбатан 8,5 фоизга кам дегани.
Шунингдек, 1,96 млрд долларлик озиқ-овқат маҳсулотлари ва тирик ҳайвонлар импорт қилинган (ўсиш 14,2 фоизга кўп).
Ярим йил мобайнида кимёвий воситалар ва шунга ўхшаш маҳсулотлар импорти ҳажми 2,6 млрд долларни ташкил этди. Ўтган йил мос даврида ушбу кўрсаткич 2,3 млрд доллар бўлганди.
Январь—июнь ойларида хизматлар импорти ҳажми 2,1 млрд долларга яқинлашган. Аввалги йил мос даврида бу рақам 1,6 млрд доллар бўлганди.
Изоҳ (0)